Berluskoni i Pucin: niebiaśpiečnyja suviazi

Za družbaj dvuch charyzmatykaŭ stajać biznes-intaresy. Piša italjanski kamentatar Karło Benedeci.

Rasiejskija aliharchi začaravali siabra Pucina, niamieckaha kanclera Hierharda Fryca Kurta Šrodera. Pośpiech natchniŭ rasiejcaŭ, i jany prapanavali ŭžo Ramana Prodzi adkaznuju pasadu ŭ kiraŭnictvie «South Stream». Prodzi, adnak, choć i nazvaŭ prapanovu «spakuślivaj», ale adchiliŭ jaje. Mierkavałasia, što jon uznačalić supolny prajekt vyviedki i zdabyčy ŭ krainach Treciaha śvietu, u tym liku Libii. Nia vyklučana, adnak, što taja samaja prapanova budzie pieraskiravanaja da inšaha viadomaha persanaža. Im moža stać čałaviek z atačeńnia Berluskoni, uličvajučy niepasrednyja kantakty pamiž Kramlom i kiraŭnikom chołdynhu «Mediaset».

Rasiejcam treba mižnarodnaja padtrymka: budaŭnictva «South Stream» maje pačacca ŭ 2010 h. A Eŭropa prahnie rasiejskaha hazu. Akramia «South Stream», jaki vyhniecca duhoj praz Serbiju i Aŭstryju da Italii, zaprajektavany taksama «North Stream». Jon maje pierasiačy Bałtyjskaje mora ŭ abychod Polščy.

Kankurentam vystupaje prajekt «Nabucco», jaki maje złučyć Centralnuju Eŭropu z radoviščami Blizkaha Ŭschodu, u toj čas jak «Igi» praz Tureččynu i Hrecyju pavinien transpartavać haz z Azerbajdžanu na poŭdzień Italii.

«Aerafłot» — «Alitalija»

Padčas sustrečy Pucina z Berluskoni na Sardynii novy-stary italjanski premjer spakušaŭ svajho novaha-staroha rasiejskaha kalehu prapanovaj, kab «Aerafłot» nabyŭ italjanskuju dziaržaŭnuju avijakampaniju «Alitalija», što daŭno ŭžo lacić z adnym kryłom. Faktyčna,italjanski premjer namiaknuŭ rasiejskamu hościu pra mahčymaść atrymać važnuju rolu ŭ vialikaj mižnarodnaj biznes-hrupie. I što vy dumajecie — nie prajšło i tydnia, jak hieneralny dyrektar rasiejskaj avijakampanii paćvierdziŭ «hatoŭnaść uznavić pieramovy z «Alitalijaj».

Havoračy pra «Aerafłot», pačynać treba ź jahonaha kiraŭnika. Davajcie pryhledziemsia da hetaha aliharcha, jaki vyznačaje kurs kampanii, jakaja dahetul lotaje pad siarpom i mołatam. Imia hetaha persanaža — Uładzimier Michajłavič Akułaŭ, 1952 h.n. Jon lotaŭ na viadomych samalotach savieckaj epochi — An-24, Tu-154. Ale imklivy karjerny rost u «Aerafłocie» jon zabiaśpiečyŭ nie dziakujučy hetamu, a praz žanićbu z dačkoj Jelcyna. Adnačasova jon siabar i Pucina.

Ciapier «Aerafłot» maje namier uvajści pa-vialikamu ŭ koła najmacniejšych avijakampanij śvietu. Ź inšaha boku, U. Akułaŭ maje taksama dostup da skarbonki Kramla, jakoju praciahvaje rasparadžacca Pucin, niahledziačy na toje, što aficyjna klučy musili b pierajści ŭ ruki novaha prezydenta Miadźviedzieva.

«Eni» — Kreml

Apetyty Maskvy ŭsio bolš zasiarodžvajucca na čornym zołacie, u jakoj by častcy śvietu jano ni zalahała. Voś čamu Kreml usio bolš uvažliva pryhladajecca da «Eni». «Šaściłapy sabaka», jak jašče nazyvajuć hetuju kampaniju, praź jaje znak, ciaham hetaha hodu pastaviŭ sabie na mecie dasiahnuć uzroŭniu zdabyčy nafty bolš za 2,05 młn barelaŭ. Taksama italjanski naftahazavy hihant maje nabyć častku hazaraźmierkavalnych sietak u Belhii. Za hetaj apošniaj aperacyjaj tyrčać vušy mahutnaha «Hazpromu». A ŭzamien kiraŭničyja koły «Šaściłapaha sabaki» abmiarkoŭvajuć z rasiejcami mahčymaść pieradačy apošnim kvoty ŭ 16,7 % radovišča «Elephant» u Libii.

Na prycele «Eni» i Irak, dzie kampanija paŭdzielničać u naftavych tarhach, abvieščanych miascovymi ŭładami na červień-lipień. I znoŭ ža tut na arenu vychodziać rasiejcy, jakija nie zhubili tamaka svaich ekanamičnych kantaktaŭ.

A voś u Kazachstanie ŭ «Eni» składvajecca patavaja sytuacyja. Pa kančatkovym prajekcie radovišča «Kašahan» (naftavyja pakłady ŭ Kaśpijskim rehijonie aceńvajucca ŭ 50 młn barelaŭ, što supastaŭna z saudaŭskimi radoviščami) pieramovy z kazachskimi ŭładami jašče nie prynieśli peŭnych vynikaŭ. Tolki pa niekatorych pazycyjach prajektu pryniaty kančatkovyja rašeńni. Maskva, u hetym sensie, mahła b raspačać pieramovy z aficyjnaj Astanoj, uličvajučy kantakty Pucina z prezydentam Nazarbajevym.

Azija — supolnyja mety

Z «Hazpromam» u jakaści haspadara-chaŭruśnika Berluskoni moža pasprabavać raspačać i azijackuju kampaniju. U Kitai i Indyi, naprykład, italjanski mahnat kvapicca investavać u infrastrukturu, bijatechnalohii, pasłuhi sučasnaj lahistyki i telekamunikacyi. Maskva, u svaju čarhu, maje svaje plany što da azijackaj hlabalizacyi.

My nia viedajem, pra što havaryłasia na sustrečy ŭ Sardynii taho, chto tolki abrali, i taho, chto voś-voś mieŭ syści. Adnak viadoma, što Pucin siońnia jak nikoli maje patrebu narmalizavać rasiejskuju infarmacyjnuju prastoru. I, vidavočna, prysutnaść zamiežnaha aperatara na ŭnutranym rynku — čamu b nie «Mediaset» — była b Kramlu darečy. Kanały «Mediaset» ź ichnym reklamnym patencyjałam u kožnym kutku śvietu mahli b stać sapraŭdnym «padarunkam» ad Bierluskoni Pucinu-preḿjeru.

Voś što staić za pacałunkami-abdymunkami. My čujem «darahi Ŭładzimier» i «darahi Sylvijo», a pisać treba «darahi «Hazprom», «darahi “Mediaset».

• 0
• 0
• 0
• 0
• 0
• 0
• 0
• 0