Zabojca Michaiła Piščeŭskaha pakarany 3 hadami kałonii, ale vyjdzie na volu praz hod
U sudzie Centralnaha rajona Minska 28 lipienia abviaścili prysud u spravie zabojstva hieja Michaiła Piščeŭskaha.
Zabojcu hieja Piščeŭskaha Dźmitryja Łukaševiča zasudzili da 3 hod pazbaŭleńnia voli i ŭziali pad vartu ŭ zale sudu. Sud adličyŭ jamu z hetaha terminu adzin hod pavodle amnistyi i jašče amal hod, jaki jon užo adbyŭ pad vartaj padčas śledztva. Takim čynam praz adzin hod asudžany vyjdzie na volu.
Taksama jon musić vypłacić 20 tysiač kampensacyi za maralnuju škodu: 10 tysiač — maci zabitaha i pa 5 tysiač — siastry i bratu.
Siastra zabitaha Michaiła Piščeŭskaha Taciana i maci Valancina kažuć, što jašče buduć dumać, ci abskardžvać im prysud.
«Što pasadzili, heta dobra, ale sumy kampensacyi śmiešnyja. Budziem dumać»,— skazała Taciana Areška, siastra Michaiła Piščeŭskaha.
Napiaredadni prakuror paprasiŭ dla abvinavačanaha ŭ zabojstvie Dźmitryja Łukaševiča 3 hady źniavoleńnia.
Łukaševič pryznaŭ siabie vinavatym u chulihanstvie, vynikam jakoha stała śmierć čałavieka, i nie admaŭlaje, što ŭdaryŭ Piščeŭskaha, bo varoža staviŭsia da jaho jak da hieja.
Michaił Piščeŭski pamior 27 kastryčnika 2015 hodu va ŭzroście 35 hod.
25 traŭnia 2014 hodu kala mienskaj kaviarni «Andervołd» adbyŭsia kanflikt, u vyniku jakoha Michaiła Piščeŭskaha źbiŭ Dźmitryj Łukaševič.
Heta druhi praces pa spravie ab śmierci Michaiła Piščeŭskaha. Pavodle letašniaha prysudu Łukaševič atrymaŭ 2 hady i 8 miesiacaŭ, ź jakich adbyŭ za kratami amal hod i byŭ vyzvaleny pavodle amnistyi.
Prakuratura viarnuła spravu na novy razhlad paśla śmierci Michaiła Piščeŭskaha ŭ kancy 2015 hodu.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary