ŁDP prapanuje admianić aficyjnaje śviatkavańnie 7 listapada abo pierajmienavać u Dzień prymireńnia i zhody
Libieralna-demakratyčnaja partyja Biełarusi prapanuje admianić na dziaržaŭnym uzroŭni śviatkavańnie 7 Listapada ci pierajmienavać jaho pavodle rasijskaha anałaha ŭ Dzień prymireńnia i zhody, havorycca ŭ zajavie vyšejšaj rady i centralnaha kamiteta partyi.
Partyja, adznačajecca ŭ dakumiencie, «zaŭsiody kazała pra toje, što nielha dzialić historyju Biełarusi na drennuju abo dobruju». «Usio, što adbyvałasia na terytoryi našaj krainy, — usio heta naša ahulnaja historyja niezaležna ad palityčnych pohladaŭ. I VKŁ, i Reč Paspalitaja, i BSSR — usio heta pryviało, u kančatkovym vyniku, da stvareńnia niezaležnaj dziaržavy — Respubliki Biełaruś», — ličać u ŁDP.
Pry hetym u ŁDP pierakananyja, što pryjšoŭ čas admianić na dziaržaŭnym uzroŭni śviatkavańnie 7 Listapada — Dnia Kastryčnickaj revalucyi.
«Heta śviata nie nacyjanalnaha maštabu, a kankretnaj palityčnaj hrupoŭki — kamunistyčnaj partyi. Jany mohuć absalutna svabodna śviatkavać i 7 Listapada, i dzień naradžeńnia Uładzimira Iljiča Lenina. Ale skažam prosta — heta karparatyŭnaje, a nie dziaržaŭnaje śviata. Lubaja revalucyja, u tym liku i Kastryčnickaja, niasuć śmierć, vajnu i hvałt. Dobrych revalucyj nie byvaje», — havorycca ŭ zajavie.
Na dumku ŁDP, dziaržaŭnymi śviatami pavinny być tyja dni, daty i padziei, jakija «abjadnoŭvajuć, majuć stvaralny, a nie razburalny charaktar».
Kamunistyčnaj partyi, ličać u ŁDP, «čas užo pierastać raskazvać kazki pra ideju Vialikaha Kastryčnika».
«U hramadzianskaj vajnie niama pravilnych čyrvonych ci pravilnych biełych. Pa abodva baki — našy ludzi z roznym ideałahičnym śvietapohladam. Hramadzianskaja vajna pryviała da śmierci vielizarnaj kolkaści biełarusaŭ pa adzin i druhi baki», — havorycca ŭ zajavie.
Balšaviki, na dumku ŁDP, pajšli na stvareńnie savieckaj Biełarusi «nasupierak svaim adnosinam da biełaruskaha naroda», jany byli «vymušanyja stvaryć BSSR na złość tym palityčnym pracesam, jakija pačalisia na našych ziemlach jašče paśla revalucyi 1917 hoda».
«My nie pavinny zabyvać dzień 7 listapada. Dla kahości heta śviata, dla kahości dzień smutku», — padkreślivajuć u ŁDP.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary