U Varšavie ŭ hetuju subotu adbudziecca muzyčny fest «Partyzan-Rok». U kancercie voźmuć udzieł biełaruskija hurty «Brutto», «Krambambula», «Dzieciuki», a taksama sumiesny biełaruska-polski muzyčny prajekt «Hańbiuki».
Pra toje, ci prosta arhanizoŭvać kancerty biełaruskich hurtoŭ u Varšavie, raskazvaje mastacki kiraŭnik kampanii «MuzTur» Jaŭhien Novaš.
RR: Jak uvohule ŭźnikła ideja festu?
Jaŭhien Novaš: «Partyzan-Rok» — heta daŭniaja ideja hurta «Brutto». Chłopcy jaje raźvivali ŭ Kijevie, ale z-za niejkich abstavinaŭ fest tam nie adbyŭsia. Paśla pradziusar «Brutto» Anton Aziźbiekian prapanavaŭ hetuju ideju adradzić, i ja jaje padtrymaŭ razam sa svajoj kamandaj «MuzTur». Heta budzie bolš biełaruski fiestyval. Hurty źjaŭlajucca fłahmanami alternatyŭnaj sceny. U kožnaha ź ich jość mocnaja pratestnaja prahrama. U toj ža čas, kalektyvy roznyja pa stylistycy, ale ich abjadnoŭvaje ahulnaja ideja.
RR: Čaho čakać słuchačam i hledačam na varšaŭskim kancercie?
Jaŭhien Novaš: Što tyčycca «Krambambuli», miarkuju, što prahučać ichnyja staryja kampazicyi, pieśni z solnaj tvorčaści Lavona i hałoŭnyja kampazicyi z «Partyzanskaha alboma». U «Brutto» budzie tradycyjnaja prahrama. U ich vyjšaŭ ukainskamoŭny sinhł, ja spadziajusia, što hetaja pieśnia prahučyć užo na našym fiestyvali. I pieśni «Lapisaŭ» pieryjadu revalucyjnaha farmatu. Vielmi radujuć «Dzieciuki». Pryadkryju sakret: ja źjaŭlajusia pradziusaram hetaha hurta. Prahučyć novaja pieśnia na vierš Karatkieviča i pieśnia, jakaja nie vykonvałasia raniej «Dzieciukami», jaje vykonvała hrupa «Kaljan», — «Radyjeaktyŭny śnieh», ale ŭ viersii «Dzieciukoŭ». Heta budzie ekskluziŭnaja reč. Mahčyma, u vykanańni hetaha hurta jana bolš nikoli nie budzie vykonvacca. Taksama vystupiać «Hańbiuki» — heta biełaruska-polski prajekt, sumiesnaja tvorčaść hurtoŭ «Dzieciuki» i «Hańba». Prahučać pieśni abodvuch hurtoŭ u sumiesnaj pank-aranžyroŭcy. Budzie dastatkova cikava.
RR: Uviesnu vy ŭžo arhanizoŭvali kancert u Varšavie z udziełam «Dzieciukoŭ» i «Brutto». Ci atrymali arhanizatary taho, čaho čakali?
Jaŭhien Novaš: Byŭ vialiki kancert, šmat ludziej, byŭ sapraŭdny apłot svabody ŭ centry Varšavy. Usio atrymałasia, byŭ vydatny huk. Nas usio zadavalniaje, muzykanty zadavolenyja. Hledačy — taksama.
Našyja prajekty nie źjaŭlajucca fondavymi, hrantavymi. My prydumvajem ideju i spadziajomsia tolki na svaje siły, na siły svajoj kamandy, jakoj ja chaču padziakavać u asobie svajoj žonki Maryny Kaleśnikavaj, Mikity Hierasimoviča, Alaksieja Buka, Dzianisa Klapackaha, dziakuj, biezumoŭna, Polskamu konsulstvu za vizavuju padtrymku.
My vielmi radyja, što prajekt «Partyzan-Rok» atrymaŭsia. Zastałosia zusim niašmat — heta vaš udzieł, pavažanyja słuchačy i hledačy.
Jašče pakul nie adbyŭsia pieršy fest «Partyzan-Rok», jak arhanizatary ŭžo viaduć pieramovy nakont nastupnaha. Taksama kampanija «Muz-Tur» maje šmat płanaŭ na praviadzieńnie kancertaŭ biełaruskich hurtoŭ i vykanaŭcaŭ u Varšavie, Biełastoku i Vilni.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary