Libieralna-demakratyčnaja partyja Biełarusi prapanavała pravieści u 2018 hodzie adnačasova z vybarami deputataŭ miascovych savietaŭ refierendum pa źmienie Kanstytucyi.
Zajava pra heta była pryniataja 23 listapada na pasiadžeńni vyšejšaha savieta i centralnaha kamiteta ŁDP, paviedamiła pres-słužba partyi. U pryvatnaści ŭ partyi prapanujuć pierajści na vybary deputataŭ usich uzroŭniaŭ pa praparcyjna-mažarytarnaj sistemie, pavialičyć termin paŭnamoctvaŭ členaŭ Savieta Respubliki, deputataŭ Pałaty pradstaŭnikoŭ Nacyjanalnaha schodu i deputataŭ miascovych savietaŭ z čatyroch da piaci hadoŭ, a taksama pavialičyć termin paŭnamoctvaŭ prezidenta ź piaci da siami hadoŭ.
«Hetyja źmieny daduć mahčymaść umacavać palityčnuju sistemu Respubliki Biełaruś, pryviaduć da dalejšaj demakratyzacyi i raźvićcia hramadzianskaj supolnaści, umacavańnia ŭłady ŭ krainie», — ličać u ŁDP.
Prasoŭvać ideju refierendumu partyja maje namier, «karystajučysia svaim pradstaŭnictvam u Saviecie Respubliki i Pałacie pradstaŭnikoŭ» — mandaty deputata i člena Savieta Respubliki majuć adpaviedna namieśnik staršyni partyi Anatol Chiščenka i staršynia Siarhiej Hajdukievič.
Apošni refierendum pa źmienie Asnoŭnaha zakona adbyŭsia 17 kastryčnika 2004 hoda ź inicyjatyvy Alaksandra Łukašenki. Pavodle jaho aficyjnych vynikaŭ było admienienaje abmiežavańnie kolkaści prezidenckich terminaŭ dla adnaho čałavieka.
7 kastryčnika Łukašenka zajaviŭ, što nie vyklučaje karektavańnia Kanstytucyi ŭ adpaviednaści z vyklikami času. «Śviet imkliva mianiajecca. My pavinny adaptavacca da źmiennych umovach, kab nie tolki nie stracić zaniatyja nami nišy, ale i znajści novyja. Mahčyma, naśpieŭ čas pravieści i analiz našaha Asnoŭnaha zakona, ja ŭžo niejak pra heta kazaŭ. Pasprabujem padyści da hetaha pytańnia z roznych bakoŭ. Akuratna, kab nie zrabić horš. Źjavilisia novyja prablemy, vykliki. Dyj čas, napeŭna, patrabuje čahości novaha. I pačynać treba z hałoŭnaha, kali my advažymsia na heta. Nam treba stvaryć hrupu mudracoŭ, jurystaŭ, jakija praanalizujuć Asnoŭny zakon. I kali treba budzie, my na heta pojdziem», — skazaŭ aficyjny lidar na sustrečy z parłamientaryjami staroha i novaha sklikańnia.
Ciapier čytajuć
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2626
Kamientary