U zabojstvie maładoj mamy, jakuju šukaŭ uvieś Minsk, padazrajuć jaje kachanka
32-hadovaja minčanka Taćciana Kursievič prapała ŭ siaredzinie listapada, źnikła i jaje stareńkaje «Aŭdzi» z paznavalnaj prykmietaj — čyrvonym bampieram. Były muž i siabroŭka źviarnulisia ŭ milicyju, da pošuku padklučylisia vałanciory atrada «Anioł».
Jak stała viadoma, zakapanaje cieła žančyny znajšli ŭ chlevie ŭ Vilejskim rajonie, za 120 km ad Minska. Aŭtamabil, pryčym častkova pierafarbavany, stajaŭ u Maładziečnie.
Pavodle papiaredniaj viersii, 15 listapada Taćciana pasvaryłasia sa svaim kachankam. Jon zabiŭ žančynu siakieraj i vyviez cieła ŭ viosku, dzie mieŭ chatu.
Siamihadovaje dzicia Taćciany ŭ hety momant było ŭ svajho baćki.
Padazravany kachanak žančyny zatrymany. U poŭnym abjomie jon vinu nie pryznaje.
Paśla pastupleńnia ŭ milicyju zajavy ab vyšuku uźnikli padazreńni ab kryminalnym charaktary zdareńnia, raspavioŭ siońnia namieśnik načalnika ŭpraŭleńnia Hałoŭnaha ŭpraŭleńnia kryminalnaha vyšuku kryminalnaj milicyi MUS Alaksandr Turban.
U kvatery, dzie žyła žančyna, apieratyŭniki vyjavili ślady, «jakija dazvolili mierkavać pra ździajśnieńnie supraćpraŭnych dziejańniaŭ u dačynieńni da minčanki».
Praź dzieviać dzion paśla źniknieńnia, 24 listapada, była zaviedziena kryminalnaja sprava pa č.1 art. 139 Kryminalnaha kodeksa (Zabojstva).
Trup byŭ znojdzieny ŭčora ŭ adnoj z haspadarčych pabudoŭ na terytoryi Vilejskaha rajona.
«Składanaść zaklučałasia ŭ tym, što złačyniec zrabiŭ zachady dla ŭtojvańnia. Akramia taho, što cieła było zakapana, miesca taksama było zamaskiravana i nie kidałasia ŭ vočy - tamu jaho było niemahčyma znajści šlacham vizualnaha nazirańnia», — dadaŭ Turban.
U vyniku cieła znajšli z dapamohaj hiearadara.
«Pa padazreńni ŭ ździajśnieńni złačynstva, u dzień zaviadzieńnia kryminalnaj spravy, byŭ zatrymany sužyciel źnikłaj, jaki pieršapačatkova zajaŭlaŭ pra svaju niedatyčnaść», - raspavioŭ namieśnik načalnika ŭpraŭleńnia SK pa Minsku Jaŭhien Archirejeŭ.
Taksama abvinavačany zajaŭlaŭ pra alibi, choć jano nie paćvierdziłasia. Paźniej jon pryznaŭsia, što zakapaŭ cieła ŭ Vilejskim rajonie - ale ŭ lesie (a nie haspabudovie), čym pastajanna vadziŭ śledstva pa iłžyvym śledzie.
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary