Televiadoŭca Alaksiej Dazorcaŭ paśla sychodu ź Biełsata pracuje ŭ Rasii — intervju
Dazorcaŭ syšoŭ ź Biełsata ŭ 2010 hodzie paśla dvuch hadoŭ pracy na telekanale. Spačatku viarnuŭsia ŭ Biełaruś, a paśla pajechaŭ pracavać u Rasiju.
«Ja źjazdžaŭ u Varšavu, bo straciŭ pracu na dziaržaŭnym telebačańni ŭ Viciebsku praz toje, što supracoŭničaŭ ź Biełsatam», — raspaviadaje Alaksiej.
Alaksiej ličyć, što zastavacca ŭ Biełarusi jamu tady było niebiaśpiečna.
— Paśla zychodu ź Biełsata ja viarnuŭsia ŭ Biełaruś, ale nidzie nie moh znajści rabotu, — kaža jon. — Rasija ž była i jość najvialikšym miedyjnym rynkam, jon maje pierśpiektyvy. Ja pryjechaŭ tudy, kali mnie było 25 hadoŭ, i na toj čas amal nie było maładych admysłoŭcaŭ z dośviedam, jaki byŭ u mianie. Biełsat farmavaŭsia z maładych ludziej, jakija pryjechali rabić telebačańnie. Jon daŭ najlepšyja viedy i najlepšyja instrumienty. Navučyŭ rabić samyja roznyja rečy, pracavać u lubych umovach. Majučy taki dośvied, ja pajechaŭ raźvivacca dalej jak viadoŭca navin, jak miedyja-mieniedžar. Mienavita Biełsat zrabiŭ mianie navinovym žurnalistam, daŭ «čujku», daŭ styl.
Da dumki, što Biełsat staŭ raźmiennaj manietaj u adnosinach pamiž Polščaj i Biełaruśsiu, Alaksiej stavicca skieptyčna. Televiadoŭca miarkuje, što Biełsat nie tolki nie ŭjaŭlaje nijakaj pahrozy aficyjnamu Minsku, ale časam i dapamahaje, bo pakazvaje słabyja miescy.
«Biełsat vykonvaŭ rolu, jakuju nie vykonvali Ministerstva kultury, Ministerstva adukacyi. Jon daŭ biełarusam biełaruskamoŭnyja mulciki, filmy. My atrymali vialiki stos jakasnych praduktaŭ tolki dziakujučy hetamu kanału. Jon dazvalaje biełarusam być biełarusami. I heta taksama patrebna aficyjnamu Minsku», — ličyć Alaksiej.
Dazorcaŭ miarkuje, kali Biełsat zakryjuć, to padobny prajekt znoŭ źjavicca nie chutka, a moža, i ŭvohule nikoli.
«Ja byŭ u situacyi, kali prajekty začynialisia. Ale ja vieru, što ludzi, jakija majuć dośvied i viedy, daduć sabie rady. Kamuści daviadziecca pierajechać z Varšavy, ja razumieju hety žal. Kamuści treba budzie šukać pracu, kab karmić siamju. Ja pažadaŭ by niekatorym viarnucca ŭ Biełaruś. Kali nie budzie mocy i talentu, kab stvaryć štości svajo, to dałučycca da inšych prajektaŭ i raźvivać ich», — raić Alaksiej.
U Rasii Alaksiej Dazorcaŭ pracavaŭ u infarmacyjnym ahienctvie RIA «Novosti» šef-redaktaram videa-słužby, byŭ šef-redaktaram słužby navin u prajekcie Kontr.tv, šef-redaktaram prahramy «Žyvy efir» na telekanale «Rasija». Ciapier pracuje viadoŭcam i vykanaŭčym pradziusaram prahramy «Vialikija naviny» na kanale «360°».
«Jak prafiesijanał, ja vierny toj spravie, jakuju rablu. U telekanał «360°» ja ŭkłaŭ šmat sił, času i dušu. Ja ŭdzielničaŭ u rebrendynhu kanała, my zrabili jaho dobrym, jakasnym, prafiesijnym. Ale kali buduć prapanovy ŭ Biełarusi, jak dla viadoŭcy ci jak dla kreatyŭnaha pradziusara, mieniedžara, kali buduć peŭnyja zapyty, ja budu ich razhladać. Ja hatovy rabić jakasny pradukt u luboj krainie. Kali heta budzie na karyść Biełarusi, tym lepš. Biełaruś — moj dom, ja — biełarus. Heta nie źmienicca, i ja vystupaju za toje, kab biełarusy imknulisia realizoŭvać svaje talenty na Radzimie taksama».
Kamientary