«Pašpart DNR» u Biełarusi: ci možna źniać hatel, arandavać aŭto, nabyć sim-kartku?
Aficyjna pašparty «DNR» i «ŁNR» u Biełarusi nie pryznanyja. Pa vialikim rachunku, ich uładalnikaŭ pamiežniki ŭvohule nie pavinny puskać u krainu. Adnak z takim pašpartam možna zajechać praz Rasiju, taksama mohuć prapuścić praź biełaruskuju miažu «ŭ zaležnaści ad žyćciovaj situacyi».
Ale ž ci zmoža «hość z Danbasu» aficyjna zamović sabie hatel? Nabyć sim-kartu?
Pa telefonie, jaki paznačany dla kansultacyj, śpiecyjalistka MTS na pytańnie, ci nie ŭźniknuć prablemy, adkazać nie zmahła. Paviedamiła, što ŭdakładnić i dašle paviedamleńnie praz peŭny čas. Ciaham paŭhadziny pryjšła sms ad słužby daviedki MTS: «Dla padklučeńnia na taryfny płan «Smart Haściavy» možacie źviarnucca ŭ ofis z vašym pašpartam».
Śpiecyjalisty i «Vełkom», i «Łajf» adkazali prykładna adnolkava — tak, padychodźcie, padklučajciesia, biez prablem.
«Kali pašparty dziejsnyja i aficyjnyja, zamiežnyja hramadzianie mohuć ździejśnić padklučeńnie», — zapeŭniła śpiecyjalistka «Vełkom».
Pašpart DNR jaje nie zasmuciŭ ani razu.
Ale paśla prośby spraŭdzić infarmacyju vyśvietliłasia, što nie ŭsio tak prosta.
«Prabačcie, ale z-za niejkich tam jurydyčnych momantaŭ padklučycca z takim pašpartam nielha», — adkazała kansultantka Łajf.
Takim čynam, dakładna niezrazumieła, što budzie, kali pryjści z «deneeraŭskim» pašpartam ŭ abaniencki centr mabilnaha apieratara. Zdajecca, moža i prakacić.
Z žyllom, adnak, buduć prablemy.
«Prezident-hatel». Šancaŭ zasialicca niama. Adkaz vietlivy, ale karotki: «Prabačcie. Ale taki pašpart my nie prymajem».
Hatel «Minsk» — taksama nie dla «apałčencaŭ». «Pašparty «DNR» i «ŁNR» u Biełarusi nie pryznanyja. Zasialicca vy nie zmožacie», — paviedamiła administratarka.
Vietlivy mieniedžar hatela «Reniesans» raspavioŭ nastupnaje:
«Ja dumaju, što kali vas puścili ŭ krainu, to prablem nie budzie. Kali vy narmalna prajechali praź miažu pa hetym dakumiencie, to prablem pry zasialeńni nie ŭźniknie».
Hatel ekanom-kłasa «Ekspres» na čyhunačnym vakzale — taksama nie vyjście.
«DNR»? A što heta? Danieckaja narodnaja respublika? Oj, nie viedaju… Napeŭna, nie zasialu. Jašče niama ŭ nas takoha», — adkazała administratarka.
A što z mašynaj? Ci možna ŭziać aŭto ŭ arendu?
Kampanija «Aŭto-hud» admaŭlaje adrazu: «Pašparty «DNR» nie prymajem. Jany dziejsnyja tolki ŭ Rasii».
Servis «Drym-kars» hramadzianinu «DNR» mašynu biez kiroŭcy davać admoviŭsia. Ale kali zamović kiroŭcu, to prablem nie ŭźniknie, zapeŭnili ŭ kampanii, niahledziačy na toje, što dla takoj pasłuhi taksama patrebien pašpart.
U servisie ź miłahučnaj nazvaj «Pčołka Maja» padbadzioryli — prablem nie budzie.
«Kab arandavać aŭto, patrebien pašpart, na jakim vašaje fota, pierakład imia i proźvišča na anhlijskuju. Kali pašpart dakładna vaš, to ŭsio budzie narmalna».
Ciapier čytajuć
Hety biełarus daśleduje rak — voś što jon kaža pra SPF ad miełanomy, navukovy prahres i samy składany ŭ lačeńni rak3
Kamientary