Jaho deviz «Chto hulaje i dureje, toj nikoli nie stareje!». 8—9 žniŭnia, Kalinkavicki rajon. Siarod inšaha, čakajecca dehustacyja samahonaŭ i parasiačyja skački.
Šosty ŭsiebiełaruski fiestyval narodnaha humaru prachodzić 8—9 žniŭnia ŭ vioskach Vialikija i Małyja Aŭciuki (Kalinkavicki rajon, Homielskaja vobłaść).
U śviacie biaruć udzieł tvorčyja kalektyvy z usich abłaściej Biełarusi, a taksama z rehijonaŭ Ukrainy. Mierapryjemstva prachodzić pad devizam
«Chto hulaje i dureje, toj nikoli nie stareje!».
8 žniŭnia ŭ vioscy Małyja Aŭciuki adkryŭsia pomnik Kałasku i Kalincy (tak tut nazyvajuć miascovych žycharoŭ). Vitajučy delehacyi, jakija prybyli na fiestyval, viadučyja nazvali hałoŭnymi Kałaskami homielskaj ziamli staršyniu Homielskaha abłvykankama Alaksandra Jakabsona i namieśnika ministra kultury Viktara Kuraša, a hałoŭnaj Kalinkaj — deputatku pałaty pradstaŭnikoŭ Raisu Cichanskuju.
Na adkryćci śviata pradstaŭnikam uładaŭ prapanavali raśpiłavać bierviano — jak załoh taho, što praz dva hady ŭ Aŭciukach budzie pabudavany i adkryty muziej narodnaha humaru. Bierviano raśpiłavali piłami pad nazvaj «Cieščyn jazyk». Płanujecca, što muziej narodnaha humaru budzie pabudavany pry ŭdziele ŭkrainskich sponsaraŭ.
Viadučyja fiestyvalu prapanavali ŭsim, chto ŭdzielničaje ŭ śviacie ŭpieršyniu, stać u kruh, zahadać žadańnie, zapluščyć vočy i čakać, kali jano zbudziecca. U vyniku pažarnyja ablili ŭsich vadoj.
Udzielniki fiestyvalu prajšli pa padvorjach žycharoŭ Vialikich i Małych Aŭciukoŭ, uviečary budzie vyznačany lepšy z dvaroŭ. Na poli pamiž vioskami projduć śviatočny kancert, konkursy, zabaŭlalnyja prahramy i karnavał. Zavieršyć viečar padviadzieńnie vynikaŭ konkursaŭ, fiejervierk i načnaja dyskateka.
U rajcentry adbudziecca futbolny turnir pamiž mužčynskaj i žanočaj kamandaj Aŭciukoŭ, konkurs na najlepšuju jušku, jakuju prapanujuć pakaštavać kuchary z roznych rajonaŭ Homielskaj vobłaści. Projdzie dehustacyja samahonu «Aŭciukoŭskija bulbulatary», a taksama konkursy dziciačaha, studenckaha i armiejskaha humaru.
Buduć arhanizavany parasiačyja skački i boj pieŭniaŭ.
Usiebiełaruski fiestyval humaru pravodzicca ŭ Aŭciukach z 1995 hoda pa inicyjatyvie staršyni Biełaruskaha dziciačaha fondu piśmieńnika Ŭładzimira Lipskaha. Asablivaść hetych viosak u tym, što Vialikija Aŭciuki pa terytoryi i nasielnictvie mienšyja za Małyja Aŭciuki.
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary