U mieksikanskim kurortnym horadzie Kankun miascovyja žychary napali na rasijanina Alaksieja Makiejeva, jaki zdymaŭ i vykładvaŭ na YouTube videa, na jakich biespadstaŭna abražaŭ i prynižaŭ haradžan. Pavodle miascovaha vydańnia Quequi, kala doma, dzie pražyvaje Makiejeŭ, sabralisia kala 400 čałaviek, uzbrojenych pałkami, kamianiami i mačete.
«Pacyjent daŭno viadomy i nie tolki ŭ Mieksicy. Čałaviek pradstaŭlaje vidavočnuju niebiaśpieku dla hramadstva i toje, što jamu ŭdałosia vyžyć paśla napadu, vialikaja ŭdača. Vielmi spadziajusia, jaho buduć sudzić i nadoŭha izalujuć», — piša viadomy rasijski błohier Illa Varłamaŭ.
Makiejeŭ zdymaŭ u Kankunie videabłoh, u jakim pravakavaŭ i biez pryčyny abražaŭ haradžanaŭ. Zvyčajna ŭ kadry była taksama papierka sa svastykaj. Miascovyja ŚMI nazyvajuć Makiejeva «ruskim nacy-łordam» (Lord Ruso Nazi).
Padčas napadu Makiejeŭ spačatku zamknuŭsia doma, a kali dźviery vybili, uciok na dach. U vyniku rasijanina źbili da straty prytomnaści, jon byŭ dastaŭleny ŭ balnicu. Pavodle Quequi, adnaho z napadnikaŭ, 19-hadovaha Karłasa Eduarda, jaki pieršym zajšoŭ da jaho ŭ dom, Makiejeŭ niekalki razoŭ udaryŭ nažom. Ad atrymanych ranieńniaŭ Eduarda pamior u balnicy. Rasijanin Alaksandr Tałmačoŭ, jaki žyvie ŭ Kankunie, raspavioŭ RIA «Naviny», što Makiejeŭ «stralaŭ, dva streły ŭ hrudzi pryjšlisia (mieksikancu), nieviadoma, vyžyŭ toj ci nie».
Videa napadu na Makiejeva:
U 2013 hodzie Makiejeŭ trapiŭ u zvodki rasijskich navin paśla taho, jak napadaŭ na dziaciej i piensijanieraŭ u padmaskoŭnaj Elektrastali i zdymaŭ heta na videa. «Mužčyna znachodzicca na ŭliku ŭ adździaleńni akazańnia psichijatryčnaj dapamohi, raniej pryciahvaŭsia da administracyjnaj adkaznaści za drobnaje chulihanstva», - paviedamili ŭ HU MUS Rasii pa Maskoŭskaj vobłaści 2 krasavika 2013 hoda.
Makiejeŭ žyvie ŭ Kankunie z 2015 hoda i pracuje instruktaram pa dajvinhu ŭ miascovaj kampanii. U minułym hodzie jaho zatrymlivali supracoŭniki palicyi.
Miascovyja žychary stvaryli pietycyju z patrabavańniem departavać «nacy-łorda» i pravieryć, nakolki zakonna im atrymany vid na žycharstva ŭ Mieksicy, jaki Makiejeŭ pastajanna pakazvaje ŭ svaich videa razam z nacysckaj svastykaj — mieksikanskija kamientatary daviedalisia pra minułaje rasijanina i ŭpeŭnienyja ŭ tym, što čałavieka z padobnaj «historyjaj» nie varta było puskać u krainu.
Kamientary