29-hadovy hramadzianin Biełarusi asudžany pa č.1 artykuła 361-3 KK «Udzieł va ŭzbrojenym farmiravańni adnaho z supraćlehłych bakoŭ na terytoryi zamiežnaj dziaržavy, a roŭna ŭdziele va ŭzbrojenym kanflikcie, vajennych dziejańniach biez ŭpaŭnavažańnia dziaržavy i pry adsutnaści prykmiet najomnictva». Dakazać najomnictva — artykuł 133KK — sudu nie ŭdałosia.
Sud prachodziŭ u Viciebsku za zakrytymi dźviaryma. Čamu tak? Bo na sudzie hučała infarmacyja, raspaŭsiud jakoj abmiežavany.
Na łavie padsudnych apynuŭsia žychar Pastavaŭ Alaksiej Jaršoŭ, jaki prymaŭ udzieł va ŭzbrojenym kanflikcie na ŭschodzie Ukrainy na baku «DNR». U vyniku Jaršoŭ asudžany na 2 hady abmiežavańnia voli biez nakiravańnia ŭ vypraŭlenčyja ŭstanovy, tak zvanaj chatniaj chimii.
Alaksiej Jaršoŭ nie saromieŭsia vykładać zdymki z bajavych dziejańniaŭ u sacyjalnych sietkach. U vyniku majecca šmat fota, dzie Jaršoŭ paziruje z ahniastrelnaj zbrojaj, tankami, na fonie ŭjezda ŭ Danieck. U Biełarusi ŭ Alaksieja była žonka i dzicia.
Raniej biełarusaŭ, jakija vajujuć na terytoryi zamiežnych dziaržavaŭ, mahli asudzić tolki pa artykule «najomnictva», adnak potym ź inicyjatyvy KDB byli ŭniesienyja źmieny ŭ Kryminalny kodeks, u vyniku čaho za kratami mohuć akazacca i tyja, chto vajuje nie za hrošy, a ź idejnych pierakanańniaŭ.
Raniej nie byli viadomyja vypadki, kab u Biełarusi sudzili mienavita za ŭdzieł u bajavych dziejańniach. Byli vypadki, kali ludziej, što vajavali na baku Ukrainy, karali, ale zusim pa inšych artykułach. Taras Avataraŭ za niezakonny abarot i kantrabandu vybuchovaha prystasavańnia byŭ prysudžany na 5 hadoŭ, a Stanisłaŭ Hančaroŭ za złosnaje chulihanstva da 7 hadoŭ kałonii.
Infarmacyi pra prysudy bajevikam «DNR» i «ŁNR» raniej u adkrytym dostupie nie było.
Kamientary