Čamu vučyli encykłapiedyi dla chłopčykaŭ i dziaŭčynak 18 hadoŭ tamu, a čamu vučać siońnia
Pamiatajecie hetyja encykłapiedyi z kalarovymi vokładkami dla «sapraŭdnych chłopčykaŭ i dziaŭčynak»? I vialikija knižki kštałtu «Usio dla dziaŭčynak pra siabroŭstva i kachańnie». Z toj ci inšaj sieryi — padobnyja vydańni byli na palicach amal kožnaj siamji, i ŭ peŭny momant stanavilisia nastolnym zboram pravił.
Takija encykłapiedyi prezientavali na dni narodzinaŭ i davali pačytać «na čas». Mienavita ź ich mnohija pradstaŭniki pakaleńnia 1990-ch i nulavych daviedvalisia, chto takija sanhviniki i jak mienstruacyja ŭpłyvaje na arhanizm.
Kaniečnie, siońnia luby školnik moža znajści cikavuju jamu infarmacyju ŭ internecie, ale knižki-instrukcyi dla chłopčykaŭ i dziaŭčynak praciahvajuć vypuskać davoli bujnymi tyražami.
Ci źmianiłasia za 18 hadoŭ padača tem i praviły žyćcia dla budučych łedzi i džentelmienaŭ? My paraŭnali knižki, jakija drukavalisia ŭ kancy 1990-ch hadoŭ, z sučasnymi, i majem što skazać.
Jakimi pavinny byli być «sapraŭdnyja» dziaŭčynki i chłopčyki ŭ 1999 hodzie?
Dziavočyja encykłapiedyi tych časoŭ adkryvajucca častkaj «Pačynajem hatavać», jakaja ŭklučaje ŭ siabie jak prymityŭnyja recepty, tak i supierskładanyja desierty i haračyja stravy. Na dziaŭčynku taksama ŭskładajucca praviły sierviroŭki stała na roznyja vypadki žyćcia ź dziasiatkam varyjantaŭ «jak pryhoža skłaści survetki». Nie navučyšsia hetaha rabić — nie zmožaš być dobraj haspadyniaj u budučyni.
Knižka dla chłopčykaŭ taksama źmiaščaje raździeł z hatavańniem ježy, ale jon zajmaje ŭ piać razoŭ mienš staronak. Pieršaj ža, hałoŭnaj častkaj jość instrukcyja, jak «Zrabić fihuru». «Biez dobraj fihury chłopčyk nie moža być pryhožym», — śćviardžajuć aŭtary encykłapiedyi i najpierš rajać raźvivać myšačnuju muskułaturu, bo tady «budzieš mocnym i zmožaš abaranić inšych».
Dziaŭčynkam dobraje, zdarovaje cieła patrebnaje ŭžo dla inšaha, kab «być padobnymi da top-madelaŭ». Źniešnaści ŭ knižkach pryśviečanaja bolšaja častka staronak: praktykavańni, adzieńnie, kaśmietyčnyja srodki — usio heta pavinna dapamahčy nablizicca da ideału, jakim zvyčajna robiać tych ža madelaŭ. Navat śpiecyjalnyja recepty sałataŭ jość — «dla pryhažości».
Prybirać kvateru i dom tady vučyli vyklučna dziaŭčynak. U chłopčykaŭ navuka skančvałasia na pryšyvańni huzika i čystcy abutku.
Kožny chłopčyk abaviazany byŭ cikavicca rybałkaj, turyzmam i pachodami ŭ hryby, a jašče šachmatami. Dziaŭčynki ŭ hety čas musili zajmacca kvietkami, šyć, viazać dy składać aryhami.
Ale najcikaviej siońnia vyhladaje raździeł «Znajomstva z kampjutaram». Sistemny błok, dyspłej, kłavijatura, pryntary i mademy — pra toje, jak usim hetym karystacca, paviedamlali tolki chłopcam. U «dziavočaj» viersii raskazami pra techniku i nie pachła, zatoje pryvodziłasia šmat infarmacyi pra toje, jaki charaktar majuć Ryby, a jaki — Bliźniaty, i jak vykarystoŭvać markier haraskopa ŭ vybudoŭvańni stasunkaŭ.
Cikava, što ŭ encykłapiedyjach dla dziaŭčynak papiaredžvajuć pra niebiaśpieku azartnych hulniaŭ, a ŭ knižkach dla chłopčykaŭ, naadvarot, navat vučać niekatorym niuansam hetaj industryi.
Voś niekatoryja cytaty z knižak 1990-ch:
Pra haspadarku
«Lubaja dziaŭčynka pavinna ŭmieć hatavać sałatu, buterbrody, supy, kab stać cudoŭnaj haspadyniaj, kali vyraście».
«Kožnaja dziaŭčynka pavinna navučycca azam šyćcia, kab umieć sšyć sabie modnuju spadničku, pryhožy fartuch i načnuju kašulu».
Pra źniešnaść
«Žyvot pavinien być płoskim, padciahnutym i pruhkim, talija — tonkaja. Ty ž chočaš być takoj ža pryhožaj i strojnaj, jak viadomyja top-madelki? Davaj pasprabujem zrabić heta razam».
«Vielmi važna, kab tvaje hrudzi mieli pryhožuju formu. Dla hetaha treba pačynać kłapacicca pra ich z 13-14 hadoŭ. Kožnuju ranicu imknisia apałoskvać hrudzi chałodnaj vadoj — heta zrobić skuru pruhkaj i pryvabnaj».
«Kali ŭ ciabie ciažkaja, niazhrabnaja pachodka, nichto nie nazavie ciabie elehantnaj, navat kali ŭ ciabie dobraja fihura i ty modna apranutaja».
«Kali ŭ ciabie kirpaty nos, vałasy treba začesvać nazad, heta schavaje tvoj niedachop».
«Pierad tym, jak vyjści na vulicu, pahladzisia ŭ lusterka — ci ŭsio u paradku z tvaim adzieńniem, ci pryhoža lažać vałasy. Pa tvaim źniešnim vyhladzie buduć rabić vysnovy pra tvaich baćkoŭ».
«Hałoŭnym kryteryjem mužčynskaj pryhažości źjaŭlajecca dobraja fihura. Niama adzieńnia, pryhažejšaha za bronzu muskułaŭ».
Pra seks
«Dziaŭčynka raście i raźvivajecca da 18 hadoŭ, a junak — da 20, tamu niepažadana pačynać rańniaje pałavoje žyćcio. Jano drenna ŭpłyvaje na niervovuju sistemu. Asabliva škodnyja dla arhanizma vypadkovyja pałavyja suviazi. Jany maralna źbiadniajuć, spustašajuć čałavieka.
Žyćciovaje
«Budź ciarplivaj, akuratnaj, ścipłaj, vietlivaj, karektnaj i starannaj!»
A pra što pišuć u sučasnych knižkach?
Zdavałasia b, prajšło 18 hadoŭ, źmianiłasia cełaje pakaleńnie, ale kali vy dumajecie, što pieršyja encykłapiedyi taksama evalucyjanavali, to pamylajeciesia.
Sučasnyja encykłapiedyi dla «supierdziaŭčynak» pačynajucca ź instrukcyj «Jak stać abajalnymi i pryvabnymi», «Jak zaŭsiody vyhladać na ŭsie 100?», «Jak pazbavicca rabacinak na tvary?», «Jak schavać zanadta šyrokija plečy?» i hetak dalej.
U 21 stahodździ, miarkujučy pa źmieście, idealnaja pryhažość vyjšła na pieršy płan. Užo nie tak važna być dobraj haspadyniaj, smačna hatavać i dobra šyć: kali ty budzieš vyhladać na ŭsie 100 — uvieś śviet i tak budzie la tvaich noh.
Usio heta patrabujecca dla taho, kab pryciahnuć uvahu supraćlehłaha połu i spadabacca inšym. Kali tabie pašancavała i ty znajšła svajo kachańnie, to trymaj jaho ŭsimi rukami i nahami: knižki navučać «Jak jaho nie zhubić». Niavažna, što dla hetaha treba «bolš maŭčać i staracca nie vynosić jamu mazhi», hałoŭnaje — vynik.
Uvodziny «Vialikaj encykłapiedyi dla chłopčykaŭ» adrazu ž pakazvajuć asnoŭny pasył: «Mužčyna pavinien być advažnym. Mužčyna pavinien być mocnym i sprytnym. Jon pavinien umieć pastajać za siabie i abaranić słaboha».
Akramia hetaha, kankurentazdolnamu chłopčyku nie abyścisia biez pačućcia humaru. Treniravacca prapanujuć na aniekdotach: adkryvać zbornik z žartami i sprabavać zdahadacca, čym skončycca kožnaja historyja. Kali ŭ samoha śmiešna žartavać usio ž nie vychodzić, rekamiendujecca słuchać inšych i paśmichacca, navat kali niezrazumieła, pra što idzie havorka: «Nikoli nie kažy, što ty nie zrazumieŭ žart, nie imknisia ŭdakładnić, što miełasia na ŭvazie. Uvohule, nie budź zanudlivym».
Pryšpilna, što z chłopčykaŭ rychtujuć dobrych arataraŭ, a ź dziaŭčynak — dobrych słuchačak, pra što jaskrava śviedčać parady pa majsterstvu publičnych vystupaŭ dla pieršych i adsutnaść čahości padobnaha dla druhich.
Što paŭtarajecca z byłych časoŭ, dyk heta raskazy pra chobi «sapraŭdnych» mužčyn: rybałka i fokusy, bieź ich nikudy. Ale pryjemna, što ŭ encykłapiedyi dla chłopčykaŭ źjaŭlajucca i modnyja parady. Sučasnyja aŭtary pryznajuć, što hetaja tema moža cikavić nie tolki dziaŭčynak.
Što tyčycca ježy, to tut schiema paŭtaraje stereatypnaje ŭjaŭleńnie pra kulinarnyja zdolnaści: dziaŭčynkam prapanoŭvajuć zasvoić azy skručvańnia sušy, a chłopčykaŭ abmiažoŭvajuć receptami jaječni, makarony i sasisak.
Dziŭna, što asnovy samaabarony ŭ karcinkach demanstrujuć tolki chłopcam. Vidać, aŭtary miarkujuć, što za kožnaj dziaŭčynkaj budzie chadzić voś taki padrychtavany chłopiec i, kali što, adrazu pastavić na miesca złodzieja.
U sučasnych knižkach bolš hruntoŭna padychodziać da temy seksu: užo nichto nie saromiejecca padrabiazna apisvać budovu pałavych orhanaŭ, fizijałohiju pałavoha akta, padrychtoŭku da pieršych intymnych znosin i mietady kantracepcyi. Raniej hetyja temy kranali tolki paviarchoŭna.
A ciapier znoŭ da najlepšych cytat.
Pra źniešnaść
«Ty zaŭsiody pavinna pryjemna pachnuć. Pachnuć tonkim vodaram, chadzić z akuratnym manikiuram».
«Chavać svaje niedachopy (karotkuju šyju, šyrokija plečy i hetak dalej) — sapraŭdnaje mastactva. Avałodaj im — i ty zmožaš vyhladać cudoŭna».
«Stanik puš-ap vizualna pavialičyć hrudzi. Z dapamohaj śpiecyjalnych stanikaŭ hrudzi nabuduć apietytny vyhlad ŭ lubym dekalte».
«Chvalavacca z-za kožnaha pryščyka i pa niekalki razoŭ układvać vałasy — heta los žančyn. Mužčyna ž pavinien zastavacca mužčynam, adnak prytrymlivacca elemientarnych normaŭ hihijeny ŭsio ž varta».
Pra ježu
«Kab zdabyć słavu kulinarnaj bahini, daviadziecca pastaracca: siońnia nikoha nie ździviš standartnym «Aliŭje», navučysia hatavać sušy i roły».
Pra adnosiny
«Kali ty chočaš zavajavać jaho serca, dać nieabchodny sihnał dapamoža tufielka, jakaja budzie pahojdvacca na nazie».
«Flirtujučy padčas hutarki, varta ŭvieś čas ździŭlacca i zachaplacca tym, što kaža ci robić surazmoŭca, jaki tabie padabajecca. Ničoha strašnaha nie zdarycca, kali heta budzie krychu nienaturalna».
«Dziaŭčynki tak lubiać bałbatać, što kali ty pieratvoryšsia ŭ dobraha słuchača, pośpiech u kachańni na pałovu zabiaśpiečany».
«Ty navat nie ŭjaŭlaješ, kolki ŭvahi dziaŭčynki nadajuć źniešnaści, tamu jany adrazu zaŭvažać, padstryžanyja ci nie tvaje paznohci i ci čysta vymytyja vałasy, u nieakuratnych — niama šancaŭ».
«Nie treba być zanadta pieraborlivym u vybary partnioraŭ — tak možna pražyć usio žyćcio ŭ adzinocie».
Pra moc
«Kožny mužčyna, što pavažaje siabie, pavinien umieć abaranić i siabie, i svaju dziaŭčynu, i bolš słaboha siabra».
Pra seks
«Kab palepšyć seksualnaje žyćcio — viedaj: syry ćviordych hatunkaŭ uzmacniajuć žadańnie».
A jak vy ličycie, dapamahajuć takija knižki z paradami sučasnym maładzionam ci, naadvarot, vučać ich kampleksavać z-za taho, što jany nie adpaviadajuć niejkim standartam? Vy nabyli b takuju knižku svajakam-padletkam?
Ciapier čytajuć
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec14
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1717
Kamientary