«90 parodzistych koniej vysialajuć na vulicu». Što adbyvajecca ŭ Ratamcy?

U Threads bjuć tryvohu i dzielacca zaściarohami z-za paviedamleńnia pryvatnym uładalnikam koniej z boku «Respublikanskaha centra alimpijskaj padrychtoŭki konnaha sportu i koniehadoŭli», zaŭvažyła «Salidarnaść». 

Z apublikavanaha ŭ sietcy lista vynikaje, što jon byŭ padpisany kiraŭnictvam Centra ŭ piatnicu 26 červienia. U im paviedamlajecca:

«Infarmuje vas pra toje, što ŭ adpaviednaści z punktam 6.8 dahavora apłatnaha akazańnia pasłuh pa ŭtrymańni kania termin jaho dziejańnia zakančvajecca 1 lipienia 2026 hoda.

U ciapierašni čas u Centry nazirajecca vysoki popyt na pasłuhi pa ŭtrymańni koniej. Dla aptymizacyi kiravańnia patokam zajaŭnikaŭ, pavyšeńnia prazrystaści pracesu zaklučeńnia dahavoraŭ i palapšeńnia jakaści absłuhoŭvańnia dalejšaje zaklučeńnie dahavoraŭ budzie ažyćciaŭlacca pa vynikach elektronnaha aŭkcyjonu (konkursu).

Data, čas i inšaja infarmacyja pra praviadzieńnie aŭkcyjonu (konkursu) buduć apublikavany na aficyjnym sajcie Centra — konnyjsport.bieł.

U suviazi z vykładzienym prosim pryniać nieabchodnyja miery dla vyzvaleńnia płoščaŭ da 1 lipienia 2026 hoda ŭ adpaviednaści z umovami dahavora».

U Threads niekalki karystalnikaŭ padzialilisia infarmacyjaj, što havorka idzie pra stajni ŭ Ratamcy.

Adna z karystalnic śćviardžaje, što terminovaje vyzvaleńnie stajni zakranie 96 pryvatnych koniej:

— Taki «małankavy» pierajezd dla koniej — heta nie prosta niazručnaść. Heta pramaja ryzyka traŭmaŭ, zachvorvańniaŭ, straty spartyŭnaj formy i navat pahrozy žyćciu. My nie suprać dyjałohu i nie admaŭlajemsia ad abmierkavańnia novych umoŭ. My prosim adnaho: razumnych terminaŭ i rašeńniaŭ, jakija nie buduć niebiaśpiečnymi dla žyvioł i ich vieršnikaŭ. Koń — nie mebla na składzie.

Druhaja karystalnica adznačaje:

— U Ratamcy nadzvyčajnaje zdareńnie. 90 parodzistych koniej vysialajuć na vulicu. Litaralna. Kiraŭnictva Centra ŭ piatnicu ŭviečary vydała paviedamleńnie: vyzvalić stajni da 1 lipienia. Na vyvaz vielizarnaha pahałoŭja ludziam pakinuli roŭna dva pracoŭnyja dni. Koni — nie karobki na składzie, ich nielha prosta vystavić za płot…

Moj koń žyvie ŭ Ratamcy dziesiać hadoŭ. Ja nie ŭjaŭlaju, jak jon pieražyvie pierajezd i rasstańnie sa svaim lubimym susiedam. Ja nie ŭjaŭlaju, jak ja pieražyvu jaho pierajezd. Ja žyvu i pracuju ŭ Ratamcy, ja pryśviaciła joj hady svajho žyćcia. A ciapier taki vyśpiatak pad zad…

Ciapier na pastoj budzie elektronny aŭkcyjon i pastajalcy buduć vybiracca na konkursnaj asnovie pa pryncypie «chto bolš zapłacić». Heta pry tym, što aŭkcyjony stroha abmiežavany zakonam i mohuć pravodzicca tolki na arendu/prodaž dziaržmajomaści i dziaržzakupki. U nas ža dahavory na pasłuhi pa ŭtrymańni. Publičnyja. Jakija nie tak prosta razarvać ci nie pradoŭžyć, kali pastajalec dobrasumlenna płacić i vykonvaje ŭmovy dahavora.

Jašče adna karystalnica padkreślivaje:

— Heta strašnaja situacyja, bo iści nam niama kudy, miescaŭ u stajniach Minskaha rajona niama… Horš nie prydumaješ.

Na sajcie «Respublikanskaha centra alimpijskaj padrychtoŭki konnaha sportu i koniehadoŭli», jaki ŭvachodzić u strukturu ministerstva sportu, ukazana, što «košt utrymańnia pryvatnaha kania za 1 stojła za sutki — 16,80 rubloŭ, u tym liku PDV 20%».

U canu ŭvachodziać: pasłuhi bryhadzira, načnych kaniavodaŭ, pasłuhi karystańnia adkrytymi spartyŭnymi zbudavańniami, zimovym maniežam, vyvaz arhaniki, padściłka i inšyja vytvorčyja zatraty. Košt karmoŭ apłačvajecca ŭładalnikami pryvatnych koniej pa faktyčnych zatratach.

Kamientaryjaŭ kiraŭnictva Centra ŭ suviazi sa skarhami pryvatnych uładalnikaŭ koniej na terminovy pierajezd pakul niama.

• 2
• 2
• 1
• 3
• 1
• 1
• 11
• 0