U filmach i telešou pra vyžyvańnie časam možna ŭbačyć paradu pić ułasnuju maču, kab paźbiehnuć abiazvodžvańnia. Na pieršy pohlad heta zdajecca łahičnym: mača ŭ asnoŭnym składajecca z vady. Ale ŭ realnaj situacyi, jak piša The Conversation, taki sposab chutčej pahoršyć stanovišča, čym dapamoža.
Arhanizm čałavieka prykładna na 60% składajecca z vady. Kab padtrymlivać pravilny bałans vadkaści i roznych rečyvaŭ, nyrki bieśpierapynna filtrujuć kroŭ. Za sutki praź ich prachodzić kala 180 litraŭ płazmy, ale amal usia hetaja vadkaść viartajecca nazad u kryvaciok. U vyhladzie mačy vyvodzicca tolki toje, što arhanizmu bolš nie patrebna.
Kančatkovy skład mačy zaležyć ad niekalkich faktaraŭ, u tym liku ad taho, nakolki vaš arhanizm nasyčany vadoj, nakolki aktyŭny vaš mietabalizm i što vy niadaŭna jeli ci jakija leki i charčovyja dabaŭki prymali.
Zvyčajna mača składajecca prykładna na 95% z vady. Astatnija 5% składajuć mačavina, kreacinin, minieralnyja soli i inšyja rečyvy, ad jakich arhanizm imkniecca pazbavicca.
Mienavita tamu adkaz na pytańnie, ci moža mača dapamahčy pry smazie, nie taki prosty. Kali čałaviek zdarovy i dobra zabiaśpiečany vadkaściu, mača sapraŭdy źmiaščaje šmat vady. Adnak navat u hetym vypadku razam ź joj u arhanizm znoŭ traplajuć pradukty abmienu, jakija nyrki ŭžo vyvieli.
Nyrki na miažy mahčymaściaŭ
U ekstremalnaj situacyi, kali arhanizm pakutuje ad niedachopu vadkaści, mača stanovicca značna bolš kancentravanaj. Arhanizm hublaje vadu praz pot i dychańnie, tamu nyrki pačynajuć ekanomić kožnuju kroplu. U vyniku kolkaść vady ŭ mačy źmianšajecca, a dola mačaviny, solaŭ i inšych praduktaŭ abmienu pavialičvajecca.
Kali vypić takuju maču, arhanizm atrymaje nie tolki krychu vadkaści, ale i vialikuju kolkaść rečyvaŭ, ad jakich jon užo sprabavaŭ pazbavicca. Kab vyvieści ich paŭtorna, nyrkam spatrebicca jašče bolš vady. Tamu ŭ doŭhaterminovaj pierśpiektyvie heta moža tolki ŭzmacnić abiazvodžvańnie.
Asablivuju niebiaśpieku ŭjaŭlaje nazapašvańnie mačaviny i inšych praduktaŭ abmienu. Kali ich kancentracyja ŭ arhaniźmie stanovicca zanadta vysokaj, jany mohuć akazvać taksičnaje ŭździejańnie, asabliva na niervovuju sistemu. U ciažkich vypadkach heta supravadžajecca młosnaściu, vanitavańniem, sutarhami, śvierbam, pamutnieńniem śviadomaści i bieź miedycynskaj dapamohi moža pahražać žyćciu.
Ci sterylnaja mača?
Isnuje jašče adna prablema. Choć mača, jakaja ŭtvarajecca ŭ nyrkach, zvyčajna nie ŭtrymlivaje bakteryj, padčas prachodžańnia praz mačavy puzyr i močapuskalny kanał jana moža zachoplivać mikraarhanizmy, jakija naturalna žyvuć u močavyvodnych šlachach.
Vypivajučy takuju maču, čałaviek znoŭ uvodzić hetyja bakteryi ŭ arhanizm. U zvyčajnych umovach straŭnikavy sok źniščaje mnohija ź ich. Ale ŭ situacyi vyžyvańnia, kali abiazvodžvańnie, ciepłavy stres i drennaje charčavańnie asłablajuć achoŭny barjer kišečnika, ryzyka traplańnia bakteryj u kroŭ uzrastaje. Heta moža adkryć šlach dla surjoznych, a ŭ horšym vypadku — śmiarotnych infiekcyj.
Tamu śpiecyjalisty nie ličać užyvańnie ŭłasnaj mačy efiektyŭnym sposabam vyratavacca ad smahi ŭ ekstremalnych umovach. U situacyi surjoznaha abiazvodžvańnia takaja «vada» moža prynieści bolš škody, čym karyści.
Kamientary