Kaleśnikava stała stypiendyjatkaj prahramy Kisindžera ŭ Instytucie Makkiejna ŭ Aryzonie
Prahrama Kissinger Fellowship pryznačana dla padtrymki dziejačaŭ u śfiery źniešniaj palityki i nacyjanalnaj biaśpieki.
Adna ź lidarak pratestaŭ 2020 hoda i byłaja palitźniavolenaja Maryja Kaleśnikava stała stypiendyjatkaj prahramy Kissinger Fellowship Instytuta Makiejna pry Aryzonskim dziaržaŭnym univiersitecie na 2026—2027 navučalny hod. Pra heta paviedamiŭ Instytut Makkiejna, piša Reform.news.
Prahrama Kissinger Fellowship pryznačana dla padtrymki viadučych dziejačaŭ u śfiery źniešniaj palityki i nacyjanalnaj biaśpieki. Na praciahu hoda Kaleśnikava budzie pracavać nad pytańniami, źviazanymi ź Biełaruśsiu i transatłantyčnaj palitykaj.
U ramkach prahramy Kaleśnikava maje namier damahacca taho, kab Biełaruś zajmała bolš prykmietnaje miesca ŭ palityčnym paradku dnia ZŠA i Jeŭropy. Jana taksama płanuje padrychtavać pieršuju kompleksnuju kancepcyju transatłantyčnaha supracoŭnictva pa Biełarusi, zasnavanuju na sieryi intervju z palitykami i ekśpiertami. Praca budzie vieścisia ŭ Bierlinie, dzie ciapier znachodzicca Kaleśnikava, a taksama ŭ Vašynhtonie.
Vykanaŭčaja dyrektarka Instytuta Makkiejna Evielin Farkas zajaviła, što Kaleśnikava «spałučaje stratehičnaje myśleńnie Hienry Kisindžara z mužnaściu Džona Makkiejna pierad abliččam vyprabavańniaŭ i addanaściu słužeńniu hramadstvu».
«Aptymizm Maryi Kaleśnikavaj i jaje lidarstva ŭ pytańniach stratehičnaha ŭzajemadziejańnia, niahledziačy na pakuty, jakija joj daviałosia pieražyć z-za režymu Łukašenki, natchniajuć. Dla nas vialiki honar padtrymać jaje svoječasovuju pracu pa hetaj važnaj temie», — skazała Farkas.
Sama Kaleśnikava padkreśliła, što ZŠA i Jeŭropa pavinny kaardynavać jak cisk na režym, tak i ŭzajemadziejańnie ź Biełaruśsiu.
«Złučanyja Štaty i Jeŭropa pavinny kaardynavać cisk i ŭzajemadziejańnie, kab abaranić Biełaruś i biełarusaŭ ad aŭtakratyčnaha ŭpłyvu siońniašniaj Rasii. Dziejničajučy razam užo ciapier, my atrymlivajem mahčymaść sfarmiravać bačańnie svabody i demakratyčnych kaštoŭnaściaŭ dla novaha pakaleńnia biełarusaŭ», — zajaviła jana.
U Instytucie Makkiejna taksama nahadali, što inicyjatyva John McCain Freedom for Political Prisoners Initiative, stvoranaja dla padtrymki palityčnych źniavolenych pa ŭsim śviecie, raniej vystupała za vyzvaleńnie Maryi Kaleśnikavaj i ŭklučyła jaje spravu ŭ lik pieršych, jakija razhladajucca ŭ ramkach prahramy
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury3
Kamientary