Kiejka Fuchimory stała prezidentam Pieru z čaćviortaj sproby

Kansiervatyŭny palityk Kiejka Fuchimory pieramahła ŭ druhim tury prezidenckich vybaraŭ u Pieru, apiaredziŭšy kandydata ad levych Robierta Sančesa, piša Bi-bi-si.

51‑hadovaja dačka Albierta Fuchimory, prezidenta Pieru kanca 90-ch, asudžanaha za złačynstvy suprać čałaviečnaści, abiacaje praciahnuć kurs baćki, jaki žorstkaj rukoj zmahaŭsia sa złačynnaściu i paŭstancami.

Kiejka Fuchimory sprabavała stać prezidentam apošnija 15 hadoŭ, i kožny raz jaje apanienty roznych pohladaŭ abjadnoŭvalisia, kab pradstaŭnik siamji Fuchimory nie staŭ kiraŭnikom dziaržavy. Čaćviortaja sproba akazałasia paśpiachovaj.

Pieralik hałasoŭ doŭžyŭsia bolš za try tydni, i pieravaha Fuchimory akazałasia adnoj z najmienšych za apošnija dziesiacihodździ. Klučavoje pieradvybarčaje abiacańnie Fuchimory — baraćba sa złačynnaściu. U hetym jana abapirajecca na spadčynu svajho baćki.

«Usia naša enierhija budzie skancentravana na tym, što my ŭmiejem rabić: [dziejničać] žorstkaj rukoj suprać złačynnaści», — zajaviła jana.

Druhi tur vybaraŭ, u jakim Fuchimory, kandydat ad partyi «Narodnaja siła», zmahałasia z kandydatam ad levaj partyi «Razam za Pieru» Robiertam Sančesam, adbyŭsia 7 červienia.

Nacyjanalnaje ŭpraŭleńnie vybarčych pracesaŭ zaviaršyła pieralik biuleteniaŭ tolki ŭ hety paniadziełak. Pavodle jaho danych, Fuchimory atrymała 9 223 396 hałasoŭ (50,135 %), a Sančes — 9 173 755 (49,865 %) hałasoŭ.

Roźnica pamiž imi skłała 49 641 hołas — adzin z najmienšych razryvaŭ u historyi prezidenckich vybaraŭ u Pieru za apošnija dziesiacihodździ.

Vyniki jašče pavinny być aficyjna abvieščanyja Nacyjanalnaj vybarčaj kamisijaj (JNE).

Kiejka Fuchimory ŭžo trojčy sprabavała stać prezidentam na praciahu apošnich 15 hadoŭ i kožny raz prajhravała ź minimalnaj roźnicaj. Na hety raz spačatku zdavałasia, što situacyja paŭtorycca: paśla padliku 85 % hałasoŭ u druhim tury ź nievialikaj pieravahaj lidziravaŭ Sančes.

Pavodle jaho słoŭ, vyniki pakazvali «značnuju pieravahu, jakaja padkreślivaje volu naroda da demakratyi i spraviadlivaści».

51‑hadovaja Kiejka Fuchimory stanie pieršaj žančynaj, abranaj prezidentam Pieru, i druhoj žančynaj na hetaj pasadzie.

Kiejka Fuchimory — dačka byłoha prezidenta Albierta Fuchimory, jaki kiravaŭ Pieru ŭ 1990—2000 hadach. Jon viadomy žorstkaj baraćboj z arhanizavanaj złačynnaściu i paŭstancami, što jaho prychilniki ličać dasiahnieńniem, a krytyki — prajavaj aŭtarytaryzmu i parušeńniaŭ pravoŭ čałavieka.

U kancy jaho kiravańnia ŭ Pieru razhareŭsia palityčny kryzis, i Fuchimory źbieh u Japoniju, adkul sprabavaŭ padać u adstaŭku pa faksie. Kanhres jaje nie pryniaŭ i adpraviŭ jaho ŭ adstaŭku. U 2003 hodzie Interpoł vydaŭ ordar na aryšt Fuchimory pa abvinavačańniach u zabojstvach, vykradańniach ludziej i złačynstvach suprać čałaviečnaści, u tym liku prymusovaj sterylizacyi.

U 2005 hodzie jaho zatrymali ŭ Čyli i ekstradavali ŭ Pieru, dzie jon byŭ asudžany na 25 hadoŭ pazbaŭleńnia voli. U 2023 hodzie jaho vyzvalili pa stanie zdaroŭja.

U 2024 hodzie Kiejka Fuchimory abviaściła, što jaje baćka płanuje ŭdzieł u vybarach 2026 hoda, ale praz dva miesiacy jon pamior.

U Pieru isnuje paniaćcie antifujimorismo (antyfuchimaryzm) — admova ad padtrymki luboj asoby ź siamji Fuchimory. Heta abjadnoŭvaje vybarščykaŭ roznych palityčnych pohladaŭ, jakija hałasujuć nie «za», a «suprać» Fuchimory.

Na vybarach 2016 hoda mnohija levyja padtrymali Piedra Pabła Kučynskaha, kab nie dapuścić pieramohi Kiejka Fuchimory. U 2021 hodzie centrysty i libierały padtrymali marksista Piedra Kastyljo, jaki pieramoh ź minimalnaj pieravahaj.

Jak adznačajuć ekśpierty, antyfuchimaryzm u apošnija hady asłabieŭ z-za rasčaravańnia ŭ inšych uradach i palityčnaj niestabilnaściu. Pieruancy stamilisia ad kryzisaŭ i ŭsprymajuć Fuchimory jak «mienšaje zło».

Jana robić staŭku na biaśpieku i baraćbu sa złačynnaściu, prapanoŭvajučy žorstkija miery, uklučajučy ŭdzieł vajskoŭcaŭ u achovie paradku, budaŭnictva miehaciurmaŭ i vysyłku nielehalnych mihrantaŭ-złačyncaŭ.

U Pieru sapraŭdy jość prablemy ź biaśpiekaj: uzrovień vymahalnictva i zabojstvaŭ dasiahnuŭ 10,7 na 100 000 žycharoŭ.

Pavodle ekśpiertaŭ, rost padtrymki takich palitykaŭ źviazany z ahulnaj stomlenaściu hramadstva ad niestabilnaści i niedavieram da tradycyjnych palityčnych sił.

• 0
• 0
• 0
• 0
• 0
• 0
• 0
• 0