Barysaŭski BATE pravioŭ matč u adkaz treciaha raŭnda Lihi čempijonaŭ. Tydzień tamu ŭ Baku biełarusy pieramahli ź likam 1:0, chacia biezumoŭnym favarytam hulni ličyŭsia «Karabach».
Pierad barysaŭskaj sustrečaj raskłady byli takija, što BATE zadavalniaŭ luby niaprojhryš, a «Karabacha» faktyčna lubaja pieramoha.
«Barysaŭ-Arena» była zapoŭnienaja pracentaŭ na 90%, a ŭsio ž na pustyja miescy pasadzili sałdataŭ ź Piečaŭ. Azierbajdžanskaja padtrymka «Karabacha» była salidnaj: zvyš sotni čałaviek na haściavym siektary, a jašče adzinočnyja balelščyki raskidanyja na trybunach.
BATE vielmi ŭpeŭniena pravioŭ pieršy tajm, što vyliłasia ŭ zabity miač, jaki na 20-j chvilinie hulni aformiŭ Mirka Ivanič. Adbyłosia heta paśla škalarskaj pamyłki abarony «Karabacha». Šaniec zabivać jašče raniej mieŭ Sihnievič.
A voś bližej da pierapynku barysaŭcy stali pamylacca bolš. Adpaviedna ataki «Karabacha» stanavilisia ŭsio bolš niebiaśpiečnymi. Takaja ž tendencyja praciahnułasia i paśla pierapynku.
Urešcie ŭsio skončyłasia hołam na 54-j chvilinie. «Karabach» adyhraŭsia namahańniami ispanskaha lehijaniera Markasa Mičeła. Jahony hoł vielmi nahadvaŭ miač, zabity ŭ Baku Stasam Drahunom — 1:1. Abiacała być niervovaja kancoŭka.
BATE atrymałasia adsunuć hulniu ad svaich varot paśla vychadu na zamienu Alaksandra Hleba. A bližej da kanca hulni da čyrvonaj kartki dahulaŭsia lehijanier «Karabacha» Inasent Emiehara.
Nie skazać, kab «Karabach» mocna išoŭ napierad u astatnija chviliny, tamu i ŭ BATE nie duža atrymlivałasia złavić supiernika na kontratacy — 1:1.
Pieramohaj nad azierbajdžancami BATE zabiaśpiečyŭ sabie hrupavy etap jeŭrakubkaŭ. Navat kali barysaŭcy sastupiać hałandskamu PSV, to buduć hulać u Lizie Jeŭropie. Pieršy matč z PSV užo na nastupnym tydni.
Ciapier čytajuć
Prapahandysty pakazali mocna schudniełaha Vasila Vieramiejčyka14
Kamientary