Jak avijatechnik-dziaŭčyna absłuhoŭvaje samaloty

Jaje redka možna ŭbačyć z manikiuram, a ŭ telefonie niama nivodnaha fota z samalotam: navošta, kali kožny pracoŭny dzień bačyš ich vielmi blizka?

Samaloty Volha palubiła ŭ 16 hadoŭ — paśla skačka z parašutam. Na avanciuru padbiła siabroŭka — dziaŭčyna pahadziłasia pajści ź joj za kampaniju. Praŭda, dumała, što abmiažujecca tolki zaniatkami, a jak sprava dojdzie da samoha skačka, pastaić zboku, bo bajałasia vyšyni. «Kali sieła ŭ samalot, skazali, što zvarotnaha šlachu niama: spuścišsia tolki z parašutam», — z uśmieškaj uspaminaje Volha. Skakała jana, darečy, trojčy — z vyšyni 800 i 1000 mietraŭ. Pryznajecca, što pieršy raz akazaŭsia samy prosty, bo nie viedaješ, čaho čakać. A voś na treci było strašna: pakul dziaŭčyna ŭźnimałasia ŭ pavietra na samalocie, dryžali kaleni.

Paśla škoły minčanka chacieła pastupać vučycca na lotčyka, ale ŭ vajskovuju akademiju nie prajšła pa zdaroŭi. Tady vybrała ŭ Minskim dziaržaŭnym vyšejšym avijacyjnym kaledžy śpiecyjalnaść «techničnaja ekspłuatacyja pavietranych sudnaŭ i ruchavikoŭ».

U svajoj hrupie Volha była adzinaj dziaŭčynaj.

— Dyskamfortu siarod chłopcaŭ ja nie adčuvała, bo ŭ dziacinstvie pravodziła kanikuły ŭ babuli razam z bratami, — dzielicca jana.

Vučoba davałasia nieskładana. «Kali jość žadańnie, to ŭsio atrymajecca. A kali niama — budzieš chadzić i skardzicca, jakija drennyja vykładčyki», — žartuje surazmoŭnica.

Vybar miesca pracy ŭ avijatechnikaŭ u našaj krainie nievialiki: aerakłuby, Minski i Aršanski avijaramontnyja zavody, kampanija «Transavijaekspart», jakaja zajmajecca hruzavymi pieravozkami. Volha pa raźmierkavańni trapiła ŭ «Biełavija»: vielmi chacieła mienavita tudy.

Razam ź joj u źmienie pracuje čałaviek 20. Usie mužčyny.

— Nie viedaju, jak kalektyŭ pastaviŭsia, kali ja pryjšła. Napeŭna, pachichikvali: «Dziaŭčo vyrašyła krucić hajki, što ź jaje ŭziać». Ale asabista mnie ničoha kryŭdnaha nichto nie kazaŭ. Ciapier užo daviarajuć.

Volha raskazvaje, što avijatechnikaŭ-navičkoŭ čakaje vyprabavańnie bahažnym adździaleńniem. Maładych śpiecyjalistaŭ adpraŭlajuć tudy kleić styki panielaŭ śpiecyjalnaj hiermastužkaj, jakaja nie prapuskaje pavietra. Rabota vielmi niazručnaja: adsiek nievysoki i davodzicca poŭzać na kalenkach.

Dopusk na samastojnaje absłuhoŭvańnie samalotaŭ dziaŭčyna atrymała nie adrazu — dla hetaha treba było prajści dadatkovyja kursy. Vučoba i stažyroŭka zajmajuć kala dvuch miesiacaŭ, i dopusk vydajecca nie na ŭvieś avijapark, a na asobnuju madel. Volha ŭžo asvoiła Bojeing 737 Slassis i Jembrajer 175 i 195.

U anhar na ramont samaloty traplajuć nie abaviazkova paśla pałomki. Čaściej heta płanavaje techabsłuhoŭvańnie. Tak, Bojeing 737 Slassis adpraŭlajuć da technikaŭ u anhar paśla 250 hadzin nalotu. Adna z samych častych rabot — zamiena kołaŭ: z-za intensiŭnaści vykarystańnia jany chutka znošvajucca. Praŭda, Volha koły, a taksama tormaz nie mianiaje, bo jany vielmi ciažkija (navat nie kožnamu mužčynu chapaje sił zrabić heta adnamu).

«Techahlad» pavietranaha sudna moža zaniać niekalki dzion i navat ceły miesiac. Naprykład, kali pravodzicca s-shiesk (vid absłuhoŭvańnia), samalot praktyčna całkam raźbirajuć. «Pieršy raz rabić heta było vielmi cikava. Zachodziš u sałon — a tam tolki «škilet». Niačasta takoje možna ŭbačyć», — dzielicca ŭražańniami Volha.

Cikava, a jak siabie adčuvaje avijatechnik na borcie samalota ŭ palocie? Nadziejna, adkazvaje dziaŭčyna. Tolki byvaje niepryjemna bačyć, jak inšyja pasažyry nieachajna pavodziać siabie ŭ sałonie: pałamanyja ramiani biaśpieki i stoliki potym daviadziecca ramantavać joj z kalehami.

Kali Volha raskazvaje pra pracu, časam zadumvajecca, jak peŭnyja ahrehaty nazyvajucca na ruskaj movie: praściej pa-anhlijsku, bo ŭsia dakumientacyja viadziecca mienavita na hetaj movie.

Abnaŭlać viedy pra techniku treba pastajanna. Pieryjadyčna pravodziacca kursy pa avijacyjnaj biaśpiecy, čałaviečym faktary. A kali śpiecyjalist pierapyniaje staž raboty na hod, to paśla jamu nanova daviadziecca paćviardžać svajo paśviedčańnie, kab atrymać prava samastojna absłuhoŭvać samaloty.

Što patrebna, kab stać avijatechnikam? Volha adznačaje, što hałoŭnaje — intares da prafiesii i metanakiravanaść:

— Kali ja vučyłasia, mnie kazali: «Dy nie budzieš ty pracavać z technikaj, pasadziać za papierki». Treba nie źviartać uvahi na heta i prosta iści da svajoj mety.

• 0
• 0
• 0
• 0
• 0
• 0
• 0
• 0