Pryjšoŭ z kuvałdaj buryć łavu Klintana. Abaroncy Kurapat spynili vandała
Uviečary 19 śniežnia abaronca Kurapataŭ Piotar Rabuška dy inšyja aktyvisty spynili vandała, jaki pryjšoŭ na terytoryju narodnaha memaryjału, admysłova kab złamać adzin ź jaho abjektaŭ — łavu Klintana, piša «Radyjo Svaboda».
Pra incydent Svabodzie raspavioŭ adzin ź lideraŭ abarony Kurapataŭ Pavał Sieviaryniec.
«Siońnia ŭ pikiecie kala restaracyi «Pojediem pojedim» nas brała ŭdzieł piaciora, u tym liku aktyvist Piotar Rabuška, jaki admysłova pryjaždžaje z Radaškavičaŭ.
Pajšoŭ jon adsiul, kab jechać dachaty, blizu 19 hadziny, a išoŭ praz Kurapaty. Raptam pazvaniŭ, što kala łavy Klintana bačyć padazronaha čałavieka z kuvałdaj i siakieraj. Što toj užo naceliŭsia buryć łavu.
Potym Piotar raspavioŭ, što padbieh da złamyśnika i spytaŭ, što jon tut robić, a toj adkazaŭ «Nie tvajho sabačaha rozumu sprava» i kinuŭsia na jaho ź siakieraj.
U hety momant nablizilisia Dzianis Urbanovič i Źmicier Kazakievič, jakija ad pikietu pabiehli na dapamohu Piatru, i tady vandał puściŭsia naŭcioki praź les. Bieh šparka, choć nios svaje instrumenty. Vidać, na kalcavoj jaho čakaŭ aŭtamabil, bo jamu niejak udałosia chutka adtul źjechać.
Na śniezie zastaŭsia adbitak kuvałdy i jahonyja ślady, my ŭsio sfatahrafavali. Kali milicyju incydent zacikavić, jość fatazdymki i apisańnie źniešnaści vandała», — skazaŭ Pavał Sieviaryniec.
Pavał Sieviaryniec nie vyklučaje, što vandał, jakoha bačyŭ aktyvist Piotar Rabuška, moža mieć dačynieńnie da paškodžańnia memaryjalnaha znaku ŭ Kurapatach, jakoje vyjaviła 18 śniežnia skulptar Volha Niačaj. Na znaku skulptar ubačyła drapiny ŭ vyhladzie zorki Davida. Viadoma, što pravierku pa hetym fakcie viadzie milicyja Baraŭlanskaha adździełu Mienskaha RAUS.
Łava Klintana była ŭstalavanaja ŭ Kurapatach u pamiać pra naviedvańnie ŭ 1994 hodzie narodnaha memaryjału prezydentam ZŠA Ŭiljamam Klintanam. Łavu dvojčy buryli, i dvojčy namahańniami abaroncaŭ Kurapataŭ jaje adnaŭlali.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja13
Kamientary