Kryteraŭ dla pryznańnia dziaciej u sacyjalna niebiaśpiečnym stanoviščy stanie ŭ dva razy mienš

Kryteryi pryznańnia dziaciej u sacyjalna niebiaśpiečnym stanoviščy (SNS) źmianiajucca ŭ Biełarusi z 1 lutaha, paviedamili BIEŁTA ŭ MUS.

Adpaviednaje pałažeńnie zaćvierdžana pastanovaj Savieta Ministraŭ numar 22 ad 15 studzienia 2019 hoda.

Raniej pakazčyki SNS byli zamacavany ŭ adpaviednaj instrukcyi Ministerstva adukacyi. Dakumient źmiaščaŭ šeść pazicyj, jakija davali mahčymaść acanić nieabchodnaść pryznańnia dziciaci ŭ sacyjalna niebiaśpiečnym stanoviščy.

«Ciapier kryteryi SNS pierapracavany, ich pieralik skaraciŭsia da troch, — adznačyŭ načalnik adździeła arhanizacyi raboty inśpiekcyj pa spravach niepaŭnaletnich upraŭleńnia prafiłaktyki hałoŭnaha ŭpraŭleńnia achovy pravaparadku i prafiłaktyki MUS Siarhiej Jankoŭski. - Pry hetym bolš dakładna vyznačany paradak vyjaŭleńnia niebiaśpiečnaj dla dziaciej abstanoŭki supracoŭnikami terytaryjalnych orhanaŭ unutranych spraŭ u miežach ich kampietencyi».

Pieršy z troch kryteryjaŭ — heta niezadavalnieńnie baćkami asnoŭnych žyćciovych patrebnaściej dziciaci (pakidańnie bieź ježy, stvareńnie pieraškod dla atrymańnia abaviazkovaj ahulnaj bazavaj adukacyi ŭ luboj formie jaje atrymańnia), sistematyčnaje nievykanańnie rekamiendacyj miedrabotnikaŭ pa dyjahnostycy, lačeńni i (abo) miedycynskaj reabilitacyi dziciaci, što pahražaje jaho žyćciu i (abo) zdaroŭju i inš.). Druhi punkt — niezabieśpiačeńnie baćkami nahladu za pavodzinami dziciaci i jaho ładam žyćcia, u vyniku čaho dzicia ŭčyniaje pravaparušeńni. Treci — viadzieńnie baćkami amaralnaha ładu žyćcia, złoŭžyvańnie svaimi pravami i (abo) žorstkaje abychodžańnie ź dziciom, u suviazi z čym maje miesca niebiaśpieka dla žyćcia i (abo) zdaroŭja dziciaci.

Abaroncy paradku zmohuć aceńvać situacyju, naviedvajučy hramadzian, jakija stajać na prafiłaktyčnym uliku, doma, pravodziačy indyvidualnuju prafiłaktyčnuju rabotu ź niepaŭnaletnimi. Heta datyčycca vizitaŭ u siemji pa miescy žycharstva, a taksama razhladu zajaŭ i paviedamleńniaŭ. Na supracoŭnikaŭ milicyi ŭskładajucca abaviazki tłumačyć siemjam, jakija znachodziacca ŭ SNS, adpaviednyja pravavyja pytańni i patrabavańni zakanadaŭstva, pry nieabchodnaści - rychtavać dakumienty dla nakiravańnia baćkoŭ abo inšych svajakoŭ niepaŭnaletnich u lačebna-pracoŭnyja prafiłaktoryi.

«Pałažeńnie rehłamientuje praviadzieńnie sacyjalnaha rasśledavańnia i pryniaćcia rašeńnia ab pryznańni dziaciej u sacyjalna niebiaśpiečnym stanoviščy. Akramia taho, dla zabieśpiačeńnia abarony pravoŭ i zakonnych intaresaŭ hramadzian u dakumiencie zamacavany paradak abskardžańnia takich rašeńniaŭ», - reziumavaŭ Siarhiej Jankoŭski.

Rašeńni ab pryznańni dziaciej u SNS, pryniatyja da ŭstupleńnia ŭ siłu hetaj pastanovy, padlahajuć pierahladu na praciahu šaści miesiacaŭ paśla ŭstupleńnia jaje ŭ siłu.

• 0
• 0
• 0
• 0
• 0
• 0
• 0
• 0