Novyja padychody ŭ infarmacyjnaj biaśpiecy dziaržavy razhledžany siońnia na naradzie ŭ Alaksandra Łukašenki, piša BiełTA.
«Chacieŭ by abmierkavać siońnia šerah pytańniaŭ, jakija tyčacca pierš za ŭsio infarmacyjnaj biaśpieki našaj dziaržavy. Tut u nas dobry kavałak pracy. Nie skazaŭ by, što my atrymali pośpiech u hetym płanie. Pytańnie vielmi surjoznaje», — skazaŭ kiraŭnik dziaržavy.
Jon adznačyŭ, što adpaviednaje pytańnie zakranałasia i ŭ čas praviedzienaj niepasredna pierad naradaj telefonnaj razmovy z Uładzimiram Pucinym. «U płanie majučaj adbycca sustrečy vyznačylisia, što my surjozna abmiarkujem hetuju prablemu ŭ kantekście našych dvuchbakovych adnosin, dzie my možam papracavać razam», — raspavioŭ biełaruski kiraŭnik.
Alaksandr Łukašenka padkreśliŭ, što infarmacyjnaja biaśpieka — heta adzin z surjoznych kirunkaŭ biaśpieki krainy ŭ cełym. «Pavinien skazać, što jana siońnia (vy heta jak nichto viedajecie) vyłučyłasia na piaredni płan u funkcyjanavańni luboj dziaržavy. Skažam prosta (nie daj boh, viadoma): lubaja chałodnaja ci tym bolš haračaja vajna nikoli nie pačynajecca bieź infarmacyjnaha cisku i prociborstva. Tamu ŭ bolš maštabnym, surjoznym klučy my hetuju prablemu ŭsiebakova praanalizujem na najbližejšym pasiadžeńni Rady biaśpieki Biełarusi. Heta pytańnie numar adzin, jakoje my razhledzim», — zajaviŭ kiraŭnik dziaržavy.
«Prapahandavać nam asabliva nie treba. A vieści baraćbu za svaje pryncypy, padymać imidž našaj krainy — heta treba. I
supraćstajać, asabliva ŭ ŚMI, tym napadam, jakija robiacca na Biełaruś (a jany časam z roznych bakoŭ robiacca), my pavinny ŭmieć. I nam treba ŭ hetym płanie vyznačycca. Mienavita infarmacyjnaja biaśpieka ŭ kantekście ŚMI, asabliva internetu, — heta asnoŭnaje pytańnie», — adznačyŭ Alaksandr Łukašenka.
Jon padkreśliŭ, što pry hetym hałoŭnaja tema — efiektyŭnaść. «Efiektyŭnaść u nas pakul słabaja, asabliva ŭ prociborstvie z roznaha rodu kanałami, staronkami i sajtami ŭ internecie. Vy bačycie, što siońnia adbyvajecca. My słaba procidziejničajem. Ale śpiecyjalistaŭ, prafiesijanałaŭ u nas choć adbaŭlaj. Prosta nie było adpaviednaj arhanizacyi. Heta treba ŭmieć rabić», — rastłumačyŭ jon.
Pavodle jaho słoŭ, taksama naśpieła pytańnie stvareńnia arhanizacyi, jakaja budzie aceńvać rejtynhi ŚMI. «Ale jaje treba zrabić tak, kab joj daviarali ludzi i, pierš za ŭsio, ŚMI, jakija buduć padlahać hetaj acency», — skazaŭ Alaksandr Łukašenka.
Jašče adzin błok pytańniaŭ na naradzie datyčyŭsia rekłamnaha rynku Biełarusi. «Treba pahladzieć, jak jaho možna abaranić, kali ŭ hetym jość peŭnaja patreba. Słovam, u jakim kirunku, u jakim kantekście my budziem dziejničać u płanie rekłamy ŭ ŚMI, kab hetyja hrošy zastalisia pierš za ŭsio ŭ nas u krainie, u vas — viadučych srodkaŭ masavaj infarmacyi», — adznačyŭ biełaruski kiraŭnik.
Na naradzie prysutničali pradstaŭniki Administracyi prezidenta, kiraŭniki ŚMI, ekśpierty.
Kamientary