Piłot Siarhiej Škiel dastaŭleny ŭ špital.
Ekipaž biełaruskaj kamandy FlexGroup paciarpieŭ avaryju padčas prachodžańnia maršrutu čarhovaha etapa rali‑rejda «Dakar‑2009».
Jak paviedamlaje pres‑słužba pasolstva Biełarusi ŭ Arhiencinie, 13 studzienia kamanda FlexGroup (piłot — Siarhiej Škiel, šturman — Alaksandr Taranienka) brała ŭdzieł u dzieviatym etapie rali‑marafona «Dakar‑2009», jaki prachodziŭ pa terytoryi Čyli na kruhavym adrezku Kapjapa — Kapjapa.
Hety maršrut pralahaŭ praź ciažkaprachodnyja piaski pustyni Atakama. Padčas pieraadoleńnia adnoj ź dziun aŭtamabil biełaruskaj kamandy pierakuliŭsia. Mašyna mocna paciarpieła. Biełaruski ekipaž skarystaŭsia ekstrannaj knopkaj vykliku dapamohi. Ekipaž byŭ dastaŭleny viertalotam u łahier, dzie kamandzie akazali pieršuju miedycynskuju dapamohu.
Pavodle infarmacyi pasolstva, šturman A.Taranienka paśla ahladu ŭračoŭ byŭ vypisany z pachodnaha špitala. Piłot S.Škiel transpartavany samalotam u adzin sa špitalaŭ horada Santjaha z traŭmaj pazvanočnika (kančatkovy dyjahnaz uračy nie ŭdakładnili).
***
Jak paviedamiŭ BiełaPAN pres‑sakratar biełaruskaj kamandy Daniła Dałmataŭ, na hety momant S.Škiel znachodzicca ŭ špitali «Mutual» u Santjaha. Pres‑sakrataru ŭdałosia źviazacca ź piłotam, jaki raskazaŭ ab akaličnaściach zdareńnia: «Dzieści na 20‑m kiłamietry čaćviortaja dziuna apynułasia vielmi «vostraj». My ŭzdymalisia ŭvierch, i praź imhnieńnie aŭtamabil cieraz «nos» pačaŭ pierakulvacca ŭniz. My ŭpali. Skarystalisia knopkaj. Nas zabrali na viertalocie ŭ miedpunkt u bivak da miesca startu. Z Sašam usio ŭ paradku, mnie zrabili renthien‑zdymak. Čakaju vynikaŭ. Što z aŭtamabilem, nie viedaju, miechaniki adpravilisia da miesca avaryi. Dabracca na hruzaviku tudy niemahčyma, mabyć, buduć sprabavać jaho zavieści».
Pavodle słoŭ D.Dałmatava, suviaź była vielmi kiepskaj. «Pa razmovie było zrazumieła, što Siarhiej Škiel vielmi rasstrojeny, ale hołas badziory. Cikaviŭsia vynikami rasijskich ekipažaŭ, raskazaŭ, što na pieršych troch dziunach bačyŭ šmat pierakulenych aŭtamabilaŭ, u tym liku i z rasijskim ściaham», — paviedamiŭ pres‑sakratar.
Pavodle jaho słoŭ, konsulskim adździełam pasolstva Biełarusi ŭ Arhiencinie ŭstanoŭleny niepasredny kantakt z uračami. Pasolstva budzie praciahvać adsočvać situacyju ź piłotam i akazvać kamandzie nieabchodnuju dapamohu.
Tym časam arhanizatary rali‑marafona «Dakar‑2009» praciahvajuć adčuvać ciažkaści z maršrutam. Užo niekalki śpiecučastkaŭ było skaročana, a siońnia pryniata rašeńnie admianić 11‑y etap rali, jaki byŭ zapłanavany na 14 studzienia. Padčas jaho ŭdzielniki pavinny byli pieraadoleć 445 kiłamietraŭ ad Kapjapa (Čyli) da Fiambały (Arhiencina). Pryčynaj admieny staŭ kiepski prahnoz nadvorja.
Rali‑rejd «Dakar‑2009» upieršyniu prachodzić pa terytoryi Paŭdniovaj Amieryki. Maršrut raźbity na 14 etapaŭ. Dzieviać ź ich prachodziać na terytoryi Arhienciny, dva — u pryhraničnych rajonach Arhienciny i Čyli, try — u Čyli. Finišuje honka 17 studzienia ŭ Buenas‑Ajresie. Za dva tydni honščyki pieraadolejuć šlach daŭžynioj 9 tys. 578 kiłamietraŭ. Biełaruskaja kamanda ŭdzielničała ŭ hetaj honcy ŭpieršyniu. Techničnuju padtrymku biełaruskamu ekipažu akazvali vadziciel‑miechanik Dźmitryj Zaparoščanka, miechaniki Uładzimir Motuz i Alaksandr Nikončyk na hruzaviku Mercedes Actros.
Kamientary