Ejsmant: «Rovary Łukašenku padaryŭ biznesmien Makaraŭ». Raskazvajem, chto taki Makaraŭ

U subotu, 1 červienia, Alaksandr Łukašenka adpraviŭsia ŭ haradski pasiołak Bałbasava. U pasiołak jon pryjechaŭ na rovary z Aleksandryi. Viełaprahułka kiraŭnika dziaržavy skłała kala 30 km.

U internet trapili foty, jak Alaksandr Łukašenka ź Mikałajem i hrupaj nabližanych da jaho asob jedzie na viełasipiedzie pa biaźludnych vulicach byłoha vajskovaha haradka.

Žurnalisty identyfikavali marku rovaraŭ «prezidenckaj kamandy». Heta nie zvykłyja biełaruskija, a darahija marki.

Rovar, na jakim Kola Łukašenka kataŭsia ŭ Bałbasavie, kaštuje niekalki tysiač jeŭra

Kp.by udakładniła ŭ pres-sakratara prezidenta, što za rovary ŭ Alaksandra Łukašenki.

— Davajcie ŭ pytańni pra darahija rovary adrazu kropki nad «i» rasstavim … Dla pačatku padkreślu asobna: na rovary, koštam jakich tak zacikavilisia niekatoryja ŚMI, dziaržava nie vydatkavała ni kapiejki, — patłumačyła Natalla Ejsmant. — Heta nie sakret: rovary, pra jakija idzie havorka, Alaksandru Ryhoraviču padaryŭ jaho siabar, biznesmien Ihar Makaraŭ. Čałaviek, usio žyćcio jaki pryśviaciŭ viełasportu, člen Alimpijskaj zbornaj kamandy SSSR, hanarovy prezident Fiederacyi viełasipiednaha sportu Rasii. Robiačy takija padarunki prezidentu i jaho synu, jon chacieŭ takim čynam dałučyć ich da hetaha vidu sportu. Treba skazać, u jaho atrymałasia! Alaksandra Ryhoraviča možna ŭbačyć i na minskim viełatreku. Dy i ŭ cełym treniroŭki na rovary stali rehularnymi ŭ spartyŭnym hrafiku prezidenta. I jašče ja adznaču, što hetyja rovary nie byli adzinymi padoranymi Iharam Siarhiejevičam, i vialikaja ich častka była pieradadziena našym spartsmienam — u nacyjanalnuju zbornuju, — skazała Ejsmant.

Chto taki Makaraŭ? Ejsmant skazała pra «Ihara Siarhiejeviča», ale, musić, mieŭcie na ŭvazie Makaraŭ Ihar Viktaravič.

57-hadovy Ihar Makaraŭ ad 2015 hoda ŭznačalvaje hrupu kampanij «Arieti» — lohka zaŭvažyć, što heta anahrama ad «Itiera». Hetaja apošniaja nazva dahetul pamiatajecca mnohim. Makaraŭ stvaryŭ «Iteru» ŭ 1992 hodzie, jakaja pravodziła časta nieprazrystyja apieracyi ź pieraprodažam hazpromaŭskaha hazu («Hazprom» — dziaržaŭnaja rasijskaja kampanija).

Ad 2013 hoda asnoŭnyja naftahazavyja aktyvy «Itery» pierajšli pad kantrol inšaha rasijskaha dziaržaŭnaha mamanta — «Rośniefti». A Makaraŭ zrabiŭ rebrendynh «Itery». U Minsku «Itera» atrymlivała vyhadnyja placoŭki pad zabudovu. Ale kali paśla kryzisu 2008—2009 hadoŭ u jaje pačalisia finansavyja ciažkaści, jana nie zmahła realizavać miehaprajekt — zabudovu byłoha aeraporta Minsk-1. 

Ad 2005 hoda Makaraŭ staŭ hanarovym konsułam Biełarusi ŭ Maskvie. Jon atrymaŭ z ruk Alaksandra Łukašenki miedal Franciška Skaryny i orden Družby narodaŭ.

• 0
• 0
• 0
• 0
• 0
• 0
• 0
• 0