Pamior Michaił Hładki, prysudžany da 8 hadoŭ za zabojstva, jakoje nie ździajśniaŭ
U krasaviku 2018 hoda pamior niezakonna asudžany Michaił Hładki. Heta toj čałaviek, jakoha ŭ 2003 hodzie sud Zasłaŭja asudziŭ da vaśmi hadoŭ kałonii strohaha režymu za złačynstva (č.1 art. 139 Kryminalnaha kodeksa), jakoje jon nie ździajśniaŭ. Praź dzieviać hadoŭ prysud u adnosinach da Michaiła byŭ admienieny, a kryminalnaja sprava spynienaja ŭ suviazi z adsutnaściu ŭ jaho dziejańniach składu złačynstva. Ale Michaił Hładki tak i nie dačakaŭsia adnaŭleńnia spraviadlivaści ŭ adnosinach da siabie z boku dziaržavy i vypłaty kampiensacyi za niezakonnaje asudžeńnie, piša Spring96.org.
Čytajcie taksama: Historyja pałamanaha žyćcia: pasadzili na 8 hod za zabojstva brata, a ciapier znajšli sapraŭdnaha złačyncu
Za što sudzili Michaiła Hładkaha?
10 kastryčnika 2002 hoda Michaił Hładki pryjšoŭ u dom da svajoj maci, dzie jana žyła ź jaho bratam Viktaram, ubačyŭ miortvuju maci i brata, jaki, jak jon dumaŭ, spaŭ na łožku. Pakolki raniej Viktar nieadnarazova źbivaŭ maci, Michaił vyrašyŭ, što jon jaje i zabiŭ. Znachodziačysia ŭ mocnym emacyjnym uzbudžeńni, jon schapiŭ siakieru i nanios niekalki udaraŭ pa hałavie brata. Paźniej jon vyklikaŭ milicyju i chutkuju dapamohu.
Adrazu śledstva pradjaviła abvinavačańnie ŭ zabojstvie dvuch čałaviek — maci i brata. Paźniej śledčyja ŭstanavili, što maci zabiŭ Viktar Hładki, a Michaił Hładki vinavaty ŭ zabojstvie tolki brata. Kali b pieršapačatkovaje abvinavačvańnie nie było źmienienaje, zhodna z zakanadaŭstvam, Hładki moh być prysudžany da śmiarotnaha pakarańnia.
U sudzie svaju vinu Michaił pryznaŭ całkam, adsiedzieŭ piać hadoŭ u kałonii i hod i siem miesiacaŭ pravioŭ na papraŭčych pracach.
Sapraŭdny zabojca Eduard Łykaŭ byŭ zatrymany pa padazreńni ŭ zabojstvie žychara Minskaha rajona ŭ 2011 hodzie. Padčas śledstva, spasyłajučysia na hutarki z katalickim śviatarom i ščyraje raskajańnie, jon pryznaŭsia ŭ zabojstvie jašče čatyroch čałaviek, u tym liku ŭ svaich pieršych zabojstvach — maci i brata Michaiła Hładkaha ŭ 2002 hodzie. Ich zabojstva było ździejśnienaje za sutki da prychodu Michaiła Hładkaha da maci — 9 kastryčnika.
Eduard Łykaŭ u 2013 hoda byŭ prysudžany da śmiarotnaha pakarańnia i rasstralany.
«Pa hetaj spravie nie byŭ pakarany ni adzin čałaviek»
Z 2014 hoda Michaił Hładki da svajoj śmierci damahaŭsia adnaŭleńnia prava na pakryćcio majomasnaj i maralnaj škody za niezakonnaje asudžeńnie, a taksama pryciahnieńnia da adkaznaści asobaŭ, jakija ŭdzielničali ŭ sudavodstvie pa jahonaj spravie. Adnak, Minski rajonny sud, Minski abłasny sud, Viarchoŭny sud, Śledčy kamitet i Hienieralny prakuror admovilisia aceńvać prysud i dokaznuju bazu, pryciahvać da dyscyplinarnaj adkaznaści słužbovych asobaŭ, spasyłajučysia na pryznalnyja pakazańni, jakich było «dastatkova dla vyrašeńnia kryminalnaj spravy ŭ sudzie».
Taksama Michaiłu Hładkamu admovili ŭ kampiensacyi škody, pakolki jaho pakazańni rasceńvajucca dziaržaŭnymi orhanami, jak samaahavor. Toj fakt, što Hładki byŭ upeŭnieny ŭ svajoj vinavataści, takim čynam davaŭ «viernyja i abjektyŭnyja pakazańni», a samaahavor źjaŭlajecca paviedamleńniem zahadzia iłžyvych pakazańniaŭ ź jakoj-niebudź metaj, nie razhladaŭsia.
Jak adznačaje kaardynatar kampanii «Pravaabaroncy suprać śmiarotnaha pakarańnia ŭ Biełarusi» Andrej Pałuda, za toje, što Michaił Hładki adbyŭ hety doŭhi termin, nie pakarali nivodnaha čałavieka.
Jak adznačaje pravaabaronca «Viasny» Valancin Stefanovič, takaja situacyja skłałasia mienavita z-za ihnaravańnia śledčymi svaich abaviazkaŭ pa poŭnym rasśledavańni spravy.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary