U pačatku lipienia z šerahaŭ Sajuza piśmieńnikaŭ Biełarusi vyklučyli 64-hadovaha Słavamira Antanoviča. Siarod jaho samych viadomych tvoraŭ — histaryčny raman «Piatro Mašeraŭ».
«Naša Niva» spytała ŭ kiraŭnika SPB Mikałaja Čarhinca, za što ž byŭ vyklučany Antanovič.
«Za paklop. Antanovič nieadnarazova dapuskaŭ takija dziejańni, ale paśla taho, jak spačatku Smalavicki rajonny sud, a potym Minski abłasny vyjavili ŭ jahonych słovach paklop, było vyrašana prybrać jaho ź liku siabroŭ SPB», — tłumačyć jon.
Sprava ŭ tym, što ŭ adnoj sa svaich publikacyj Antanovič napisaŭ, što Čarhiniec mieŭ dačynieńnie da aryštu nievinavatych u zabojstvie ludziej u Mazyrskim rajonie. Ale Čarhiniec dakazaŭ, što na toj čas navat nie pracavaŭ u orhanach MUS.
«Jahonyja pavodziny zaŭsiody byli dla nas nieprymalnymi. Jon zaŭsiody chodzić pjany, to pradstaŭlaŭsia, što jon byŭ pamočnikam Mašerava, to kazaŭ, što rasśledavaŭ śmierć Mašerava… Jon elemientarnaje trapło! Jość u nas list jahonaj rodnaj siastry na dvaccaci staronkach, kali jaho čytaješ, to žach biare. Jana piša, što hety źvier joj pahražaje, pje, pryvodzić roznuju šval u kvateru maci, svajakoŭ paraŭnoŭvaje z bydłam», — praciahvaje Čarhiniec.
«Jon chvaliŭsia, što pracavaŭ pamočnikam premjer-ministra Hienadzia Navickaha. Sapraŭdy, adpracavaŭ paru miesiacaŭ, ale potym jaho vypierli adtul. Ja razmaŭlaŭ sa staršynioj Kanstytucyjnaha suda Piatrom Mikłaševičam, bo Antanovič chvaliŭsia, što byŭ pałkoŭnikam justycyi ŭ prakuratury. Vydaŭ navat knihu, dzie jon na vokładcy ŭ formie pałkoŭnika, ale jon i blizka nie maje hetaha zvańnia! Trapło i chvalko. I niavažna, jakich jon pohladaŭ. Jon ža ŭładu nie čapaje, a apazicyju krytykuje», — raskazaŭ kiraŭnik SPB.
Sam Słavamir Antanovič miarkuje, što jaho nie mahli vyklučyć z SPB. Bo litaralna za dva dni da pasiedžańnia prezidyuma Sajuza sam napisaŭ zajavu na vychad z arhanizacyi.
«U suviazi z tym, što styl kiraŭnictva tvorčaj arhanizacyi nie adpaviadaje patrabavańniam zakanadaŭstva i tvorčamu charaktaru piśmieńnickaj dziejnaści, prašu ličyć mianie vybyłym z členaŭ Sajuza piśmieńnikaŭ Biełarusi z 09.07.2019 hoda», — było napisana ŭ zajavie Antanoviča.
Tym nie mienš hałasavańnie ab vyklučeńni Antanoviča ź siabroŭ arhanizacyi ŭsio ž adbyłosia. Z usich členaŭ prezidyuma ŭstrymalisia tolki Anatol Zekaŭ i Uładzimir Lipski. Astatnija padtrymali pazicyju Čarhinca.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary