Ekśpierty: lasnyja pažary ŭ Sibiry paskarajuć tajańnie arktyčnych ledavikoŭ
Hihanckija lasnyja pažary, jakija bušujuć u Sibiry, mohuć spravakavać katastrafičnyja nastupstvy dla ekałohii Ziamli. Pra heta paviedamlaje telekanał CBS News, spasyłajučysia na źviestki Suśvietnaj mietearałahičnaj arhanizacyi.
Apasieńni źviazvajuć z doŭhaterminovym uździejańniem na navakolnaje asiarodździe pryrodnych uzharańniaŭ, maštaby jakich u hetym siezonie dasiahnuli vyklučnaha ŭzroŭniu. Takija pažary — patencyjnaja pahroza dla Arktyki i klimatu ŭ cełym, kažuć ekśpierty. Na spadarožnikavych zdymkach bačnyja abłoki dymu, jakija dasiahajuć arktyčnych rajonaŭ.
«Prablema ŭ tym, što saža, jakaja padaje na lod, zaciamniaje jaho. Tym samym pamianšajecca zdolnaść pavierchni adlustroŭvać i zatrymlivajecca bolš ciapła», — kažuć u Suśvietnaj mietearałahičnaj arhanizacyi. U suviazi z hetym u bližejšaj pierśpiektyvie ldy ŭ Arktycy buduć źmianšacca značna chutčej.
U Greenpeace dadajuć, što saža i popieł paskarajuć nie tolki rastavańnie arktyčnych ildoŭ, ale jašče viečnaj mierzłaty, hetyja pracesy supravadžajucca vydzialeńniem hazaŭ, jakija ŭzmacniajuć hłabalnaje paciapleńnie. U svaju čarhu pavyšeńnie tempieratury stvaraje jašče bolš umoŭ dla novych lasnych pažaraŭ.
Pa infarmacyi Greenpeace, u hetym siezonie ŭ Rasii zhareła ŭžo bolš za 12 młn hiektaraŭ lesu — heta bolš za płošču Partuhalii ci Słavakii i Charvatyi razam uziatych. Samyja mahutnyja lasnyja pažary bušujuć u Irkuckaj vobłaści, Krasnajarskim krai i Jakucii. Ahulnaja płošča pryrodnych uzharańniaŭ u hetych rehijonach dasiahaje 3,5 młn ha. Rasijskija ŭłady nie tušać pažary ŭ ciažkadastupnych terytoryjach, pakolki vydatki na heta pieravyšajuć prahnazavanuju škodu.
Mahutnyja pryrodnyja ŭzharańni zafiksavanyja sioleta nie tolki ŭ Sibiry, ale jašče na Alascy i ŭ Hrenłandyi. Pavodle Suśvietnaj mietearałahičnaj arhanizacyi, z pačatku leta hetyja pažary vydzielili stolki SO2, kolki Šviecyja abo Bielhija za hod.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie15
Kamientary