Palaki patłumačyli, čamu namalavali na ciahniku kartu ź biełaruskimi haradami ŭ składzie Polščy
U sieradu šerah ŚMI paviedamiŭ, što pa Polščy jeździać elektryčki z kartaj častki terytoryi Biełarusi. Radyjo Svaboda skantaktavałasia z uładami Padkarpackaha vajavodztva na paŭdniovym uschodzie Polščy. Heta była ichnaja inicyjatyva.
Akazvajecca, na rejki ciahnik vyjechaŭ jašče letaś — 27 vieraśnia 2018 hodu. Ale ŚMI zaŭvažyli jaho tolki ciapier, dziakujučy dopisu ŭ Fejsbuku ŭkrainskaha ilustratara Sašy Kamjachava.
U sacyjalnych sietkach raspačalisia haračyja dyskusii. Palakaŭ abvinavacili ŭ sprobie pierahladu miežaŭ, imperskaści i navat rasiźmie. Pra ciahnik ź histaryčnaj mapaj paviedamili ŚMI Biełarusi, Ukrainy i navat prapucinskija servisy ŭ Rasiei, u tym liku najbujniejšaje dziaržaŭnaje infarmacyjnaje ahienctva RIA Novosti.
Jak daviedałasia Svaboda, Inicyjatyva takoha afarmleńnia adnaho z vahonaŭ naležyć uładam Padkarpaćcia. Pra heta nam raspaviali ŭ pres-słužbie ŭpravy Padkarpackaha vajavodztva. Rašeńnie aformić takim čynam elektryčku było pryniataje jašče ŭ lipieni 2018 hodu.
Takim čynam ułady rehijonu chacieli ŭšanavać 100-hodździe adnaŭleńnia polskaj niezaležnaści.
«Mapa pradstaŭlaje realnyja miežy II Rečy Paspalitaj i źjaŭlajecca tolki elementam vialikaj hrafiki, pryśviečanaj adznačeńniu 100-hodździa adnaŭleńnia polskaj niezaležnaści», — skazaŭ Svabodzie pres-sakrataŭ vajavodzkaha ŭpraŭleńnia Tomaš Lejka.
Jon dadaŭ, što hałoŭnym elementam vyjavy źjaŭlajecca bieły aroł u karonie, a taksama vyjavy žaŭnieraŭ, bitvaŭ i partret Juzafa Piłsudzkaha, usio ŭ bieła-čyrvonych kolerach polskaha ściaha.
Mapa Polščy, u skład jakoj pamiž I i II usiaśvietnymi vojnami, da 1939 hoda, uvachodzili zachodnija častki Biełarusi i Ŭkrainy, była naniesienaja na adzin vahon.
«Mapa Polščy — heta zhadka pra pieršyja, histaryčnyja miežy adrodžanaj polskaj dziaržavy. Heta nieadjemny element hrafičnych dekaracyj z nahody 100-hodździa niezaležnaści pa ŭsioj krainie. Tamu nas ciažka abvinavacić u padryvie cełasnaści miežaŭ Biełarusi i Ukrainy, a taksama ŭ raspalvańni revanšysckich nastrojaŭ», — skazaŭ pres-sakratar upravy Padkarpackaha vajavodztva Tomaš Lejka.
Kamientary