Abnoŭleny Pracoŭny kodeks ustupaje ŭ siłu 28 studzienia. Klučavym navacyjam dakumienta była pryśviečana dyskusija novaha prajektu «SB. Biełaruś siehodnia» «Kampietentny aŭtorak», paviedamlaje BIEŁTA.
Pracoŭny kodeks u novaj redakcyi zvodzić razam raniej pryniatyja normy, napracavanuju praktyku i dadatkovyja zachady jak pa abaronie pravoŭ rabotnikaŭ, tak i pašyreńni paŭnamoctvaŭ najmalnikaŭ. Siarod asnoŭnych navacyj — bolš mahčymaściaŭ dla sumiaščeńnia karjery i vychavańnia dziaciej, dadatkovyja harantyi rabotnikam pieradpiensijnaha ŭzrostu, padaŭžeńnie kantraktu z sumlennymi supracoŭnikami, normy dystancyjnaj i časovaj pracy, vyrazny padzieł adkaznaści za materyjalnuju škodu.
Na fonie takich značnych źmienaŭ nie takoj užo siensacyjnaj vyhladaje nastupnaja navacyja: z 28 studzienia ŭ zahadzie pradpryjemstva, arhanizacyi ci inšym dakumiencie nie pavinien vykarystoŭvacca podpis «v.a.» abo «vrio» (časova vykonvajučy abaviazki). «Jość štatny raskład, u jakim i varta prapisać, chto zamiaščaje dyrektara, kali jon chvory ci ŭ adpačynku. Padpisvać dakumienty jon pavinien pa svajoj pasadzie», — adznačyła načalnik hałoŭnaha jurydyčnaha ŭpraŭleńnia Ministerstva pracy i sacyjalnaj abarony Valancina Masłoŭskaja.
Pry hetym sudździa sudovaj kalehii pa hramadzianskich spravach Viarchoŭnaha suda, kandydat jurydyčnych navuk Ryma Filipčyk miarkuje, što admiena abrevijatur «v.a.» i «vrio» pryžyviecca nie adrazu.
Taksama, na jaje dumku, składana pradkazać, jak budzie pracavać norma ab časovym pieravodzie rabotnika da inšaha najmalnika (ź jaho zhody na termin da šaści miesiacaŭ z zachavańniem zarobku na ŭzroŭni nie nižej, čym pa asnoŭnym miescy pracy). «Pieraviedzieny rabotnik padparadkoŭvajecca praviłam pracoŭnaha rasparadku časovaha najmalnika. A miery dyscyplinarnaha spahnańnia da jaho moža ŭžyć tolki najmalnik, ź jakim zaklučany asnoŭny pracoŭny dahavor. Norma, chutčej za ŭsio, budzie pracavać mienavita ŭ śfiery šefskaj dapamohi», — vykazała zdahadku Ryma Filipčyk. Havorka pra vypadki, kali pradpryjemstvy akazvajuć dapamohu padšefnym sielhasarhanizacyjam.
Ciapier čytajuć
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec17
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1818
Kamientary