«U Amieryku viarnuŭsia roskvit». Tramp vystupiŭ z dakładam ab stanoviščy ZŠA

Uviečary 4 lutaha prezident ZŠA Donald Tramp vystupiŭ na sumiesnym pasiadžeńni abiedźviuch pałat Kanhresa sa štohadovym dakładam ab stanoviščy krainy, adznačaje Radyjo Svaboda. Dakład, zrobleny za dzieviać miesiacaŭ da prezidenckich vybaraŭ, prahučaŭ jak pieradvybarčy vystup prezidenta, jaki źmiaščaje spravazdaču ab dasiahnieńniach i pramuju krytyku ŭ adras apanientaŭ.

Pavodle prezidenta Trampa, try hady jahonaha prezidenctva viarnuli Złučanym Štatam roskvit: pamianšeńnie rehulavańnia ekanomiki, źnižeńnie padatkaŭ i zaklučeńnie novych handlovych damovaŭ stali hałoŭnymi pryčynami ŭstojlivaha ekanamičnaha rostu apošnich hadoŭ.

Pavodle Trampa,

• za try hady było stvorana 7 miljonaŭ novych pracoŭnych miescaŭ,
• biespracoŭje źniziłasia da najnižejšaha za 50 hadoŭ uzroŭniu,
• rekordna nizkaje biespracoŭje i rekordna vysokaja zaniataść zafiksavanyja siarod afraamierykancaŭ,
• rezka źniziŭsia ŭzrovień biednaści, ZŠA pieratvarylisia ŭ najbujniejšaha ŭ śviecie samadastatkovaha vytvorcu enerharesursaŭ.

Tramp zrabiŭ akcent na tym, što ŭsiaho hetaha ŭdałosia damahčysia dziakujučy tamu, što jon pierakreśliŭ palityku administracyi svajho papiarednika demakrata Baraka Abamy. Padčas pramovy jon ustupiŭ u amal adkrytuju palemiku z apanientami z Demakratyčnaj partyi pa roznych pytańniach.

Siarod inšaha,

• apanirujučy demakratam, jakija patrabujuć dadatkovych srodkaŭ na dziaržaŭnyja škoły, Tramp zaklikaŭ Kanhres vyłučyć hrošy na prahramu dapamohi baćkam, jakija chočuć adpravić dziaciej u pryvatnyja škoły, a nie «ŭ niedziejazdolnyja dziaržaŭnyja škoły»;
• abviaściŭšy pra pośpiechi sprobaŭ pierapynić płyń nielehalnaj mihracyi ŭ ZŠA, Tramp abvinavaciŭ demakrataŭ u padtrymcy nielehałaŭ, jakich niekatoryja štaty i harady nie vydajuć na patrabavańnie fiederalnaj imihracyjnaj słužby i dajuć im biaspłatnaje miedycynskaje absłuhoŭvańnie;
• zajaviŭšy, što jon zharnuŭ palityku pašyreńnia suviaziaŭ z Kubaj, prezident Tramp abviaściŭ, što ZŠA adnavili padtrymku demakratyčnych siłaŭ u Łacinskaj Amierycy.

Havoračy pra płany, Tramp, siarod inšaha, zajaviŭ pra

• nieabchodnaść skončyć amierykanskuju vajskovuju prysutnaść u Afhanistanie,
• namier kinuć značnyja srodki na abnaŭleńnie infrastruktury krainy, na arhanizacyju palotaŭ na Miesiac i Mars i na kančatkovuju pieramohu nad epidemijaj ŚNIDa, jakaja, pavodle jaho, moža być dasiahnutaja da kanca dziesiacihodździa,
• padkreśliŭ staŭku na ŭmacavańnie abaranazdolnaści ZŠA, značnaje pavieličeńnie abaronnaha biudžetu.

Naziralniki adznačyli prykmietnaje adroźnieńnie reakcyi aŭdytoryi ŭ zale na prapanovy prezidenta. Zakanadaŭcy-demakraty amal nie apładziravali prezidentu. A niekatoryja ź jaho zajavaŭ byli sustretyja hułam abureńnia ź ich boku. Dziesiać zakanadaŭcaŭ-demakrataŭ bajkatavali zvarot prezidenta da Kanhresa.

Padčas vystupu Tramp ničoha nie skazaŭ pra praces impičmentu, jaki pavinien zaviaršycca 5 lutaha hałasavańniem u Sienacie ZŠA. Reparciory zaŭvažyli, što pierad pačatkam vystupu jon nie padaŭ ruku śpikieru Pałaty pradstaŭnikoŭ Nensi Pełosi, jakaja inicyjavała praces impičmientu. Adrazu paśla zaviaršeńnia vystupu Pełosi, jakaja zajmała razam ź vice-prezidentam ZŠA Majkam Pensam adno z dvuch staršynskich kresłaŭ, razarvała tekst vystupu Trampa.

• 0
• 0
• 0
• 0
• 0
• 0
• 0
• 0