Kruty pra rasiejskuju naftu: Budziem kuplać pa suśvietnych cenach, čaho i patrabavała Biełaruś

Pieršy vice-premjer biełaruskaha ŭrada Dźmitryj Kruty prakamientavaŭ žurnalistam vyniki pieramoŭ, jakija prajšli 7 lutaha na najvyšejšym uzroŭni ŭ Sočy. Biełaruskija naftapierapracoŭčyja zavody, na čym i nastojvaŭ biełaruski bok, buduć kuplać naftu ŭ rasijskich kampanij pa cenach suśvietnaha rynku, pieradaje karespandent BiełTA.

«Kali kazać pra damoŭlenaści pa nafcie, naftavym rynku, to rasijski bok zhadziŭsia, što biełaruskija NPZ buduć kuplać naftu pa damoŭlenaści z rasijskimi naftavymi kampanijami pa cenach, jakija ŭstaloŭvajucca na suśvietnym rynku. Darečy, hetaha ž na praciahu ŭsich pieramoŭ nieadnarazova patrabavali naš prezident, biełaruski bok. Što Biełarusi nie treba nijakich śpiecyjalnych ekskluziŭnych umoŭ. My chočam kuplać naftu pa suśvietnych kaciroŭkach, i nie horšuju», — skazaŭ Dźmitryj Kruty.

Pavodle jaho słoŭ, Uładzimir Pucin pahadziŭsia z hetym padychodam. «Bolš za toje, jon paabiacaŭ, što rasiejski ŭrad akaža ŭsialakaje sadziejničańnie ŭ našaj pracy z rasijskimi zdabyvajučymi kampanijami. Kab pastaŭki nafty na biełaruskija NPZ byli mienavita na takich umovach, pra jakija ja skazaŭ vyšej», — udakładniŭ pieršy vice-premjer.

Jon źviarnuŭ uvahu, što rasijski naftavy rynak vielmi nieadnastajny i kanstatavaŭ, što, pa sutnaści, pałovu studzienia baki nie znachodzilisia ŭ režymie pieramoŭ z-za taho, što ŭ Rasii praciahvalisia navahodnija vakacyi. «Ale ciapier intensiŭnaść kantaktaŭ pamiž našymi subjektami haspadarańnia vyrasła. I my bačym, što ŭ toj ža Rasii prykładna 100 młn t nafty z ahulnaha abjomu zdabyvajecca i pastaŭlajecca nievialikimi kampanijami. My prosta za šmat hadoŭ pryzvyčailisia, što naftu ŭ Biełaruś pastaŭlaje ŭ asnoŭnym vialikaja piaciorka — «Rasnafta», «Łukojł», «Tatnafta» i inšyja kampanii, — adznačyŭ Dźmitryj Kruty. — Ź imi taksama pieramovy buduć, viadoma, u abaviazkovym paradku praciahvacca. Užo ŭ najbližejšyja dni ministr enierhietyki Rasii paabiacaŭ ź imi ŭsimi sustrecca, paznačyć novyje ŭmovy pracy na biełaruskim rynku i akazać usialakaje sadziejničańnie ŭ bolš chutkim zaklučeńni cenavych kantraktaŭ. Ale pry hetym i kancern «Biełnaftachim», i našy NPZ praciahnuć pracu z absalutna ŭsimi subjektami rasijskaha naftavaha rynku. Litaralna na nastupnym tydni takija pieramovy ŭžo pačniom».

«Isnavali peŭnyja abmiežavańni pa dopusku da tranzitnaj truby «Transnafty». Prezident Rasii paabiacaŭ hetyja ŭsie abmiežavańni źniać. Jany ŭviedzieny dla ŭsich ekspartnych rynkaŭ i pastavak jaho asobnym ukazam. Na Biełaruś hety ŭkaz nie budzie raspaŭsiudžvacca. Heta značyć, lubaja kampanija, jakoj budzie vyhadna i cikava pracavać z našymi NPZ, atrymaje dopusk da truby, tranzitu, pastavak praz «Transnaftu» jak ahienta. Tut nijakich abmiežavańniaŭ nie budzie. I my čakajem, što cikavaść da našaj krainy i rynku z boku hetych — bolš drobnych i siaredniaha uzroŭniu — subjektaŭ padvysicca, i my zmožam u chutkim časie hetyja kantrakty zaklučyć», — zajaviŭ Dźmitryj Kruty.

• 0
• 0
• 0
• 0
• 0
• 0
• 0
• 0