Padčas razhonu pratestaŭ u Mjanmie ŭ sieradu zahinuli 38 čałaviek. Pra heta zajaviła śpiecpasłańnik hienieralnaha sakratara AAN pa Mjanmie Kryścin Šranier-Burhienier. Pavodle jaje słoŭ, sierada stała dla hetaj krainy samym «kryvavym dniom» za apošni miesiac.
Nahadajem, što 1 lutaha vajskoŭcy zładzili pieravarot. U hety dzień pavinien byŭ pačać pracu abrany ŭ listapadzie parłamient, jakomu treba było zaćvierdzić novy skład urada. Adnak armija zajaviła, što ich umiašańnie ŭ palityčnuju situacyju abumoŭlena falsifikacyjami sa śpisami vybarščykaŭ u chodzie parłamienckich vybaraŭ i raspačatych chvalavańniaŭ.
Prezidenta krainy Vin Mjina, dziarždaradcu Aun San Su Čžy i inšych kiraŭnikoŭ kirujučaj partyi «Nacyjanalnaja liha za demakratyju» ŭziali pad vartu. Kamandujučy ŭzbrojenymi siłami hienierał Min Aunh Chłajn staŭ časovym prezidentam.
U adkaz u krainie pačalisia pratesty i była abvieščana nacyjanalnaja zabastoŭka. U niekatoryja bujnyja harady ŭłady ŭviali vajennuju techniku, u dziaržavie praktyčna całkam adklučali internet.
Mitynhoŭcaŭ razhaniali stralboj na paražeńnie, ślozaciečnym hazam, śviatłošumavymi hranatami. Kraina znachodzicca ŭ režymie nadzvyčajnaha stanovišča.
Pavodle karespandenta Bi-bi-si pa Paŭdniova-Uschodniaj Azii, siarod zahinułych i paranienych u sieradu ŭ haradach Mandałaj i Maniva šmat ludziej z kulavymi ranieńniami ŭ hrudzi i hałavu, što kaža pra toje, što sałdaty i palicyja stralali na paražeńnie.
U hety ž dzień u najbujniejšym horadzie krainy Janhonie palicyja sabrała žycharoŭ adnaho z rajonaŭ, pastroiła ich u šerah, prymusiŭšy pakłaści ruki na hałavu, i zabrała na hruzavikach.
Lidar pratestu ŭ horadzie Minhian raspavioŭ ahienctvu Reuters, što palicyja spačatku ŭžyła ślozaciečny haz i śviatłošumavyja hranaty, a potym pačała stralać bajavymi patronami.
«Jany nie nakiroŭvali na nas vadamioty z zaklikami razyścisia, jany prosta adkryli ahoń», — kaža jon.
Pa paviedamleńni ahienctva Press Trust of India, u Minhianie byli zabityja dva padletki.
Kamientary