Padstaŭ dla zryvu žniva niama, zaŭlajuć u Saviecie ministraŭ.
Padstaŭ dla zryvu ŭboračnaj kampanii niama, zajaŭlajuć va ŭradzie. Hatoŭnaść haspadarak da ŭborki ŭradžaju abmiarkoŭvałasia na pasiadžeńni prezidyuma Savieta ministraŭ 14 lipienia.
Jak adznačyŭ premjer‑ministr Siarhiej Sidorski, Biełaruś upieršyniu pačynaje ŭboračnuju kampaniju z zapasam u 1 młn. ton letašniaha zbožža.
«My ŭpieršyniu majem taki vynik. Treba razumna rasparadzicca reštkami i razumna, u ścisnutyja terminy, pravieści ŭboračnuju kampaniju», — zajaviŭ jon.
Pavodle słoŭ premjera, rehijonam vydzielena dastatkova hrašovych srodkaŭ, «kab aktyŭna pravieści ŭboračnuju rabotu». «Na žal, ja nie baču takoj aktyŭnaj pracy z boku abłaściej», — skazaŭ Sidorski.
Kiraŭnik urada, u pryvatnaści, raskrytykavaŭ pracu pa ŭvodzie ŭ ekspłuatacyju novych zierniesušylnych kompleksaŭ u rehijonach. Jon nahadaŭ, što sioleta płanavałasia pabudavać kala 90 novych zierniesušylnych kompleksaŭ, adnak nie ŭsiudy hetaja rabota vykonvajecca. Sidorski zapatrabavaŭ da 1 žniŭnia vykanać usie zapłanavanyja mierapryjemstvy. «Nijakich padstaŭ dla zryvaŭ (płana pa ŭvodzie zierniesušylnych kompleksaŭ, — BiełaPAN.) niama i nie było», — padkreśliŭ jon.
Premjer taksama zapatrabavaŭ u raniej ahavoranyja terminy zabiaśpiečyć haspadarki technikaj. «Kambajny pavinny być pastaŭleny ŭ raniej uzhodnienyja terminy. Sistemna pytańnie pavinna być vyrašana na praciahu lipienia», — zajaviŭ Sidorski.
Jon padkreśliŭ, što nieabchodna aktyvizavać rabotu pa ramoncie kambajnaŭ, nie hatovych da ŭboračnaj. Dla hetaha, pavodle słoŭ premjera, haspadarki pavinny vykupić adramantavanyja ruchaviki, karobki pieramieny pieradač i inšyja kamplektujučyja ŭ zavodaŭ i servisnych centraŭ.
Pavodle słoŭ kiraŭnika ŭrada, dla praviadzieńnia ŭboračnaj kampanii było vydzielena dastatkova resursaŭ, i nijakich dadatkovych finansaŭ urad davać nie źbirajecca.
«Pierakredytoŭvać nikoha nie budziem», — papiaredziŭ Sidorski. Viartańnie ŭsich uziatych kredytaŭ haspadarki pavinny zabiaśpiečyć u poŭnym abjomie, padkreśliŭ jon.
Što da zabieśpiačeńnia haspadarak paliŭnymi resursami, to, pavodle słoŭ premjer‑ministra, na hetyja mety płanujecca vydzielić kala 500 młrd. rubloŭ. Paliva ŭ haspadarkach dastatkova, kab paśpiachova pravieści ŭboračnuju kampaniju, ličyć Sidorski.
«My pastavili ambitnuju zadaču, i nijakich padstaŭ dla jaje zryvu niama.Sioleta my pavinny poŭnaściu zabiaśpiečyć siabie krupami i poŭnaściu adyści ad ich impartu», — skazaŭ kiraŭnik urada.
Jak raniej zajaŭlaŭ namieśnik ministra sielskaj haspadarki i charčavańnia Vasil Siedzin, sioleta ŭ Biełarusi płanujecca sabrać nie mienš čym 9,4 młn. ton zbožža. U 2008 hodzie było sabrana 9 młn. ton.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary