«Vyrak vynies nie sudździa». Baćka Mikoły Dziadka pra 5 hadoŭ kałonii dla syna
Anarchist Mikoła Dziadok atrymaŭ 5 hadoŭ kałonii. Jaho baćka, były sudździa Alaksandr Dziadok prakamientavaŭ vyrak:
«Mikoła trymaŭsia dobra: badziory, pazityŭny, aptymistyčny, z upeŭnienaściu ŭ sabie. Paśmichaŭsia. Navat sprabavaŭ z nami niejak stasavacca, ale kanvoj nie davaŭ mahčymaści, zabaraniali nie tolki słovy, ale i žesty. Vielmi hruba i ahresiŭna, synu nie dali navat mahčymaści rukoju machnuć nam.
Ani dla nas, ani dla syna prysud nie byŭ siurpryzam, bo my ludzi, jakija žyvuć u biełaruskich realijach. My viedajem, što pravasudździa ŭ Biełarusi niama, što sudy kirujucca, jany nie niezaležnyja, što dziaržabvinavaŭca vykazaŭ pazicyju ŭłady ŭ dačynieńni da Mikoły, kali prapanavaŭ sudu pryznačyć 5 hadoŭ.
Tamu vyrak nie staŭ niečakanym. Kaniečnie, niepryjemna, maleńkaja nadzieja była, ale nastolki maleńkaja, što my ŭvahi na jaje nie źviartali.
Ja atrymaŭ ad syna list u pačatku listapada. Jon piša pra siabie, pra zdaroŭje, ź jakim jo prablemy. Syn za minuły hod pierachvareŭ i prastudaj, i, chutčej za ŭsio, kavidam. My namahajemsia, kab Mikołu akazvali miedyčnuju dapamohu, pieradajem leki. Biaruć amal usie, ale byvajuć dziŭnyja vyklučeńni — naprykład, niadaŭna nie ŭziali «Kietanov» ad bolu, nie tłumačačy, čamu.
Tamu prablemy sa zdaroŭjem u Mikoły jość, ale nie katastrafičnyja. U astatnim jon trymajecca dobra, i maralna i psichałahična. Jon małajčyna, jon bajec, zastajecca ŭpeŭnienym u sabie, u svaich pohladach, heta daje jamu siły zmahacca dalej.
My razumiejem, što skarhi i apielacyi nie majuć sensu, kali čakać ad ich źmianieńniaŭ u prysudzie. Bo, ja liču, što vyrak ža vynieśli nie sudździa i nie dziaržabvinavaŭca, usio vyrašałasia zusim u inšych kabinietach.
Ale abskardžvać usio adno budziem. Heta nieabchodna, bo my musim vyrazić svajo staŭleńnie da niezakonnaha i niespraviadlivaha prysudu».
Praŭładnyja telehram-kanały niadaŭna raspaŭsiudžvali čutki, što na Mikołu Dziadka źbirajucca zavieści jašče adnu spravu. Ale jaho baćka kaža, što takoj infarmacyi niama:
«Sam Mikoła ci jaho advakaty taksama pra heta ničoha nie viedajuć».
Mikołu Dziadka zatrymali ŭ listapadzie 2020, abvinavacili pa troch artykułach KK: arhanizacyja dziejańniaŭ, jakija parušajuć hramadski paradak; niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ; zakliki da dziejańniaŭ, skiravanych na pryčynieńnie škody nacyjanalnaj biaśpiecy Respubliki Biełaruś.
Na adnym z pasiadžeńniaŭ Mikoła raspavioŭ pra žudasnyja katavańni paśla zatrymańnia, navat nazvaŭšy proźviščy rabotnikaŭ HUBAZiK, jakija ździekvalisia ź jaho, ale nijakich nastupstvaŭ dla siłavikoŭ heta nie paciahnuła.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary