Zamiest italjanskich čery — tamaty z Armienii. Ci źnikli z kramaŭ pradukty, jakija trapili pad kontrsankcyi?
Z pačatku hoda ŭ Biełaruś zabaronieny impart asobnych praduktaŭ. Pad kontrsankcyi patrapili jeŭrapiejskija sadavina i harodnina, syry, arechi, kiłbasy, šakaład. Što ciapier z cenami i asartymientam?
Na asartymiencie abmiežavańni impartu pakul praktyčna nie adbilisia. Ale dla častki praduktaŭ źmianilisia ceny i pastaŭščyki.
Karcinku paraŭnoŭvajem sa śniežańskaj, dla źvierki brali katałoh servisu «Je-dastaŭka».
Voźmiem harodninu. Ź Jeŭropy, naprykład, zavoziłasia šmat sartoŭ kapusty. Miesiac tamu kapusta «Savojskaja» ź Niderłandaŭ kaštavała 5,99 rubla za kiłahram, ciapier — 9,99 (plus 67% u canie). Niekatorych sartoŭ — brokali, bruselskaj, kviacistaj, piekinskaj — u anłajn-kramie niama, choć u śniežni chapała. Raniej ich zavozili ź Ispanii, Niderłandaŭ i Polščy.
Sałodki pierac ciapier pradajecca nie ispanski, a turecki, tamaty čery nie ź Italii, a z Armienii ci Maroka. Kaštujuć jany prykładna stolki ž.
Istotna prybaviła ŭ canie asobnaja ekzatyčnaja harodnina. Fienchiel (jaho dastaŭlajuć ź Italii) ciapier kaštuje bolš na 67%, ispanski sielderej — na 14%. Ale heta ŭsio ž nie tyja pradukty, jakija biełarusy časta nabyvajuć.
Krainy-imparciory źmianilisia i pa niekatorych fruktach. Tak, zamiest italjanskich kivi ŭ kramu zavieźli iranskija. Na miesca ispanskich klemiencinaŭ pryjšli marakanskija. A voś bielhijskija hrušy i polskija jabłyki na miescy (tolki niekatoryja pazicyi na 12% daražejšyja).
Što tyčycca arechaŭ, toj ža mindal zavozicca z ZŠA. Ale jon za miesiac navat patańnieŭ — na 10%.
Litoŭski syr «Džuhas» nikudy nie źnik i kaštuje stolki ž. Italjanskija syry na vahu i syry ź ćvillu, što zavozili z Polščy, ceny na jakija my fiksavali, taksama nie padaraželi.
Pahladzim sałodkija prysmaki. Niamiecki šakaład Ritter Sport pradajecca za stolki ž, za kolki i ŭ śniežni. Toje ž ź impartnym šakadam Lindt, Toblerone, Karl Fazer.
Nahadajem, što pad biełaruskija kontrsankcyi trapiła peŭnaja pradukcyja ź Jeŭrasajuza, ZŠA, Kanady, Vialikabrytanii, Šviejcaryi, Narviehii, Čarnahoryi, Isłandyi, Paŭnočnaj Makiedonii. Ale impart zabaronieny nie całkam. Tak, dazvoleny ŭvoz praduktaŭ u miežach kvot i «dla zabieśpiačeńnia zbałansavanaści na spažyvieckim rynku». Ustaloŭvaje kvoty MARH i Ministerstva sielskaj haspadarki.
Čytajcie taksama:
Urad pryniaŭ pastanovu ab sankcyjach: u «čorny śpis» patrapiła miasa, małako, kandytarka i sadavina ź ES, ZŠA i Kanady. Što heta značyć?
Z kramaŭ źniknuć batončyki Mars i Sniskers? Tłumačym, što budzie z šakaładkami z-za sankcyj
Były ministr kultury Rusłan Čarniecki znajšoŭ sabie padpracoŭku9
Kamientary