Baćka-dyrektar Michaił Komar i jahony syn ustupili ŭ zmovu i krali hrošy pradpryjemstva. Kradziež ažyćciaŭlaŭsia šlacham zaklučeńnia fiktyŭnych dahavoraŭ.
Były hienieralny dyrektar AAT «Rahačoŭski małočna‑kansiervavy kambinat» Michaił Komar pryhavorany Homielskim abłasnym sudom da dzieviaci hadoŭ pazbaŭleńnia voli z kanfiskacyjaj majomaści i pazbaŭleńniem prava zajmać kirujučyja pasady terminam na piać hadoŭ.
Pryhavor ustupić u siłu 10 žniŭnia, za hety čas u abvinavačvanaha jość prava na padaču kasacyjnaj skarhi. Pryhavor byŭ abvieščany 24 lipienia.
Jak paviedamili BiełaPAN u Homielskim abłasnym sudzie, były kiraŭnik «pryznany vinavatym u kradziažy šlacham złoŭžyvańnia słužbovymi paŭnamoctvami pry zavałodańni majomaściu, učynienym słužbovaj asobaj z vykarystańniem svaich słužbovych paŭnamoctvaŭ arhanizavanaj hrupaj u bujnym pamiery» (č. 4 art. 210 KK). Pa dadzienym artykule jamu pryznačana dzieviać hadoŭ pazbaŭleńnia voli z kanfiskacyjaj majomaści i pazbaŭleńniem prava zajmać kirujučyja pasady terminam na piać hadoŭ.
Jon taksama pryznany vinavatym «u złoŭžyvańni słužbovymi paŭnamoctvami, heta značyć naŭmysnym, napierakor intaresam słužby ŭčynieńni słužbovaj asobaj dziejańniaŭ z vykarystańniem svaich słužbovych paŭnamoctvaŭ» (č.3 art.424 KK). Za heta jamu pryznačana vosiem hadoŭ pazbaŭleńnia voli z kanfiskacyjaj majomaści.
Komara taksama pryznali vinavatym u niezakonnym nabyćci i zachoŭvańni bojeprypasaŭ (č.2 art.295 KK), za što abvinavačvanamu pryznačany adzin hod pazbaŭleńnia voli biez kanfiskacyi.
Šlacham pahłynańnia mienš strohaha pakarańnia bolš strohim kančatkova pryznačana dzieviać hadoŭ pazbaŭleńnia voli z kanfiskacyjaj, pazbaŭleńniem prava zajmać kirujučyja pasady terminam na piać hadoŭ i adbyvańniem pakarańnia ŭ PK uzmocnienaha režymu. Sud pastanaviŭ spahnać z byłoha dyrektara na karyść Rahačoŭskaha MKK bolš za 8,7 młrd. rubloŭ.
Kryminalnuju spravu ŭ adnosinach da byłoha kiraŭnika abłsud razhladaŭ z 16 lutaha 2009 hoda.
57‑hadovy hiendyrektar kambinata byŭ zatrymany supracoŭnikami KDB 30 maja 2009 hoda. U adnosinach da kiraŭnika pradpryjemstva i jaho syna Antona Komara, u toj čas hienieralnaha dyrektara maskoŭskaha pradstaŭnictva Rahačoŭskaha MKK, była raspačata kryminalnaja sprava.
Śpiecsłužby ŭstanavili, što baćka i syn, ustupiŭšy u zmovu ź inšymi nie ŭstanoŭlenymi śledstvam asobami, na praciahu 2006—2008 hadoŭ krali hrašovyja srodki pradpryjemstva. Kradziež ažyćciaŭlaŭsia šlacham zaklučeńnia fiktyŭnych dahavoraŭ. Pravaachoŭniki dapuskali, što takim čynam było skradziena bolš za 8 młrd. biełaruskich rubloŭ.
U mai 2008 hoda, kali baćka byŭ zatrymany, synu ŭdałosia schavacca ad orhanaŭ kryminalnaha pieraśledu. Jon byŭ abvieščany ŭ mižnarodny vyšuk. Spačatku 29‑hadovy mužčyna chavaŭsia na terytoryi Rasii, adnak adšukać jaho ŭdałosia ŭ ispanskim Alikante, dzie ŭ listapadzie 2008 hoda jon byŭ zatrymany. Jaho taksama čakaje sudovy razbor.
Kamientary