Na zbroju ad niemcaŭ ukraincam raźličvać nie varta, ale kredyt im daduć. Pra što damovilisia ministry ŭ Kijevie
Ministry zamiežnych spraŭ Ukrainy i Hiermanii Dmytro Kuleba i Analena Bierbak zajavili, što znajšli kampramisny varyjant ab supracy ŭ śfiery abarony i biaśpieki, jaki nie praduhledžvaje pastavak zbroi. Pieramovy adbyvalisia na fonie pahrozy ŭvarvańnia rasijskich vojskaŭ na ŭkrainskuju terytoryju, piša Radyjo Svaboda.
«Vielmi važna, što siońnia my, skažu vielmi dypłamatyčna, havaryli nie tolki pra toje, što Hiermanija nie moža zrabić z tych ci inšych pryčyn, ale i pra toje, što Hiermanija moža zrabić, i pra toje, što jana maje namier zrabić dla padtrymki Ukrainy kankretna ŭ śfiery abarony i biaśpieki», — skazaŭ Dmytro Kuleba 7 lutaha paśla sustrečy ŭ Kijevie ź ministram zamiežnych spraŭ Niamieččyny Analenaj Bierbak.
Ukrainski ministr padkreśliŭ, što razmova była maksimalna ščyraj, niahledziačy na roznyja pazicyi.
«Naša zadača palahaje nie ŭ tym, kab svarycca, a ŭ tym, kab znajści rašeńni. I ja miarkuju, što siońnia my znajšli prajekt rašeńnia. Ciapier budziem čakać krok ad niamieckaha ŭrada», — dadaŭ Kuleba.
U svaju čarhu, Analena Bierbak dadała, što Hiermanija robić «vialiki ŭniosak u biaśpieku Ukrainy». Jana paviedamiła pra namier dać kredyt dla ažyćciaŭleńnia reformaŭ, realizacyi prajektaŭ u śfiery enierhietyčnaj biaśpieki i kibierbiaśpieki.
«Mahčymy napad nie tolki ŭ vajskovym płanie, ale taksama i kibierataka, i spynieńnie padačy enierhanośbitaŭ — heta taksama kiepska, jak i tankavaja ataka», — patłumačyła ministr zamiežnych spraŭ Hiermanii.
Na dumku Dmytra Kuleby, dla Rasii bazavy scenar — unutranaja destabilizacyja situacyi va Ukrainie.
«Dla hetaha Rasija vykarystoŭvaje vajskovuju eskałacyju, kibierataki, raspaŭsiudžvaje dezynfarmacyju i sprabuje ŭbić klin u dačynieńni Ukrainy i jaje mižnarodnych partnioraŭ. A heta robiać zaraz jak Rasija, tak i prarasijskija palityki ŭ adpaviednych krainach, dadajučy cisk ź inšaha boku», — dadaŭ ukrainski ministr.
Čytajcie taksama:
Kancler Niamieččyny: U vypadku ahresii suprać Ukrainy Rasiju čakajuć vielmi žorstkija sankcyi
Analena Bierbak: Siarod mieraŭ reahavańnia na rasijskuju ahresiju razhladajucca sankcyi ŭ dačynieńni da «Paŭnočnaha patoka — 2»
Ministr abarony Łatvii: Palityka Hiermanii ŭ dačynieńni da Rasii nie ŭpisvajecca ŭ naš čas
Kancler Hiermanii Šolc: Rasija pavinna pryznać, što siła ŭ praŭdzie
Ciapier čytajuć
U turmie pamior były supracoŭnik KDB Mikałaj Varapaj, asudžany za špijanaž na karyść Ukrainy2
Kamientary