Jak ja znajšoŭ dla dziaržavy 500 miljardaŭ rubloŭ

Słužba biaśpieki prezidenta Respubliki Biełaruś apiakaje svajho klijenta na 37 miljardaŭ rubloŭ u hod. Heta na 2 miljardy bolej vydatkaŭ krainy na parłamient.

U hety ciažki čas kožny, čym moža, dziaržavie dapamahčy abaviazany. A inačaj prymusiać. Ja vyrašyŭ u ramkach asabistaj dapamohi biudžet «uparadkavać». Tam, mnie padałosia, šmat jašče lišnich vydatkaŭ paśla prezidenckich pravak zastałasia. Sačycie za rukami — miljardy pad rukoj, kali biudžet paličyć.

Aparaty statutnych orhanaŭ miždziaržaŭnaj intehracyi — 15,4 miljardy rubloŭ. Usiesajuznyja čynoŭniki abychodziacca nam u 5,3 miljony dalaraŭ? Miła! Kolki ž vas tam?

Vykanaŭčy kamitet SND — 2 miljardy rubloŭ, plus miljard na (pasaromielisia b, ha) Saviet Mižparłamienckaj Asamblei SND. I jašče 4 miljardy rubloŭ na ŭtrymańnie Intehracyjnaha kamitetu Jeŭrazijskaj ekanamičnaj supolnaści.

Adličeńni ŭ biudžet sajuznaj dziaržavy Biełarusi i Rasii — 150,9 miljardaŭ rubloŭ — na piensiju Pał Pałyču Baradzinu.

Arhanizacyja Damovy ab kalektyŭnaj biaśpiecy — 1,3 miljardy rubloŭ. Kali naš podpis kaštuje stolki, to lepš, mo, padpisać u nastupnym hodzie.

Voś mnie što dziŭna — «na vybary i refierendum» u hetym hodzie my vydatkoŭvajem 619 miljonaŭ rubloŭ! Heta ja štości ŭpuściŭ? Ci heta taki zarobak u CVK — tam ža čałaviek piać pracujuć! Z hetaj sumy 25 miljonaŭ pojdzie «na mižnarodnuju dziejnaść» ni adnaho razu nie pryznanych u śviecie vybaraŭ.

Nacyjanalny schod na kipučuju svaju «mižnarodnuju dziejnaść» taksama niabłaha vydatkoŭvaje — amal 1,7 miljardy tudy, kali ŭličvać «kulturnyja suviazi» deputataŭ. Kali nas Jeŭropa pryznaje, adčuvaju, što ŭsie hrošy maje na ich mižnarodnuju dziejnaść syduć.

Heta ničoha, kali my hod nie pahulajemsia u sałdacikaŭ? Sinchronnaść paradu budzie parušana, ale kraina heta pieražyvie. Kali daviedajecca, što vajennyja vučeńni i inšyja mabilizacyjnyja spravy kaštujuć 98 miljardaŭ rubloŭ.

Voś taki artykuł u biudžecie: «Prykładnyja navukovyja daśledavańni, navukova‑techničnyja prahramy i prajekty ŭ vobłaści pravaachoŭnaj dziejnaści i zabieśpiačeńnia biaśpieki». Cana pytańnia — 800 miljonaŭ rubloŭ.

«Prykładnyja navukovyja daśledavańni, navukova‑techničnyja prahramy i prajekty ŭ vobłaści žyllova‑kamunalnych pasłuh». Heta jašče 1 miljard 90 miljonaŭ. Jak u majoj žyroŭcy nie źjaviŭsia artykuł «na prykładnoje navukovaje daśledavańnie Piatroviču»?

Krychu biantežać mianie voś try pazicyi ŭ biudžecie:

Biełaruski fond finansavaj padtrymki pradprymalnikaŭ — 212 miljonaŭ rubloŭ.

Raźvićcio pradprymalnickaj dziejnaści — 1 miljard rubloŭ.

Finansavaja dapamoha jurydyčnym asobam i indyvidualnym pradprymalnikam — 110 miljardaŭ.

Tak, tak — rašuča prybirajem usie hetyja pradprymalnickija miljardy ź biudžetu — i hladzim — ci adčuli pradprymalniki, jak asłabieŭ dziaržaŭny kłopat pra ich? Vielmi chaču, kab adčuli, sumniavajusia…

Cikava jašče viedać, kudy iduć 52,7 miljardy rubloŭ pa «prahramie raźvićcia i padtrymcy padsobnych haspadarak hramadzian». Dačniki, heta ž i vam taksama!

Ciapier praviarajem ščyraść patryjatyzmu. Lohka! Adbirajem u BRSM ich 17,5 miljardaŭ rubloŭ. U BRSM ja vieru — jany hetaje vyprabavańnie projduć. Nach*** ich tady naahuł finansavać….

Zaŭsiody mianie kranaŭ kłopat majoj dziaržavy ab samych kvołych, małamajomasnych. Kancernu Biełnaftachim dapamohuć u hetym kryzisnym hodzie nie tak kab vielmi, ale dapamohuć — 7,3 tryljonami (!) rubloŭ.

Nu vy zrazumieli — tam jašče skaračać i skaračać. Ale jość artykuły niedatykalnyja.

Słužba biaśpieki prezidenta Respubliki Biełaruś apiakaje svajho klijenta na 37 miljardaŭ rubloŭ u hod. Heta na 2 miljardy bolej vydatkaŭ krainy na parłamient (tam 110 deputataŭ ź ministerskimi zarobkami i sienatary jašče).

Amal usie maje praŭki byli tam, dzie ŭ prezidenta ŭzdryhnuła ruka — i jon strymaŭsia. Kiraŭnik dziaržavy skaračaŭ vydatki na adukacyju (minus 377 miljardaŭ), na achovu zdaroŭja (minus 278 miljardaŭ), na sacyjalnuju palityku (minus 1,4 tryljona).

malishevsky.livejournal.com

• 0
• 0
• 0
• 0
• 0
• 0
• 0
• 0