Ajcišnik, rodam z Žodzina. Raskazvajem pra adnaho z dobraachvotnikaŭ z byłoha atrada «Lićvin», jaki raźbiŭsia ŭ avaryi ŭ Rumynii
14 červienia ŭ aŭtakatastrofie na rumynskich darohach zahinuli dva biełarusy. Mužčyny 35 i 27 hadoŭ raniej byli ŭ dobraachvotnickim atradzie «Lićvin», što isnavaŭ u Adesie. «Naša Niva» daviedałasia bolš pra adnaho z zahinułych.
27-hadovaha mužčynu, jaki raźbiŭsia u toj aŭtakatastrofie, zvali Jaŭhien. Jon byŭ rodam z Žodzina, pracavaŭ ajcišnikam.
Adzin ź jaho siabroŭ raskazvaje, što jany paznajomilisia ŭ sakaviku 2020 hoda, prajšli razam praz mnostva pratesnych maršaŭ. 8 listapada 2020 hoda ich abodvuch zatrymali. Jaŭhien atrymaŭ paśla taho maršu 15 sutak, jakija pravioŭ u žodzinskaj turmie.
Chłopiec vielmi nie chacieŭ źjazdžać ź Biełarusi, ale ŭ pačatku 2021 hoda ŭsio-taki pakinuŭ krainu. Jak miarkuje jaho siabar, Jaŭhien pieražyvaŭ, što jamu moža pahražać palityčny pieraśled. Žodziniec pierabraŭsia ŭ Adesu, dzie i žyŭ da niadaŭniaha času, addalena praciahvaŭ pracavać u IT. Paralelna z hetym Jaŭhien udzielničaŭ u akcyjach biełarusaŭ Adesy, adnojčy pryjazdžaŭ na demanstracyju na biełaruska-ŭkrainskaj miažy.
«Vielmi dobry chłopiec, idejny, biełaruski, jaki duža nienavidzieŭ hety režym i zmahaŭsia ź im usimi dazvolenymi srodkami», — apisvaje Jaŭhiena siabar.
Kali pačałasia vajna, Jaŭhien dałučyŭsia da atrada «Lićvin». Svajaki chłopca pajšli abaraniać Ukrainu niedzie pad Mikałajevym, i sam Jaŭhien žadaŭ zajmacca tym ža. Jak raskazvaje jaho siabar, «chłopiec lubiŭ Ukrainu, napeŭna, nie mienš, čym Biełaruś».
Paru dzion tamu, paśla taho, jak atrad samaraspuściŭsia, Jaŭhien pryniaŭ rašeńnie viarnucca ŭ IT, pakinuć Adesu i dałučycca da svaich siabroŭ u Polščy. «Va Ukrainie ja ŭžo asabliva nikomu nie patrebny», — tłumačyŭ jon siabru.
Druhi zahinuły — Dźmitryj — byŭ namieśnikam kamandzira atrada. Jon jechaŭ sustrecca ź siamjoj pierad padpisańniem kantrakta i adahnać svaju mašynu na biełaruskich numarach. Siamja jaho čakała ŭ Čarnahoryju — chłopiec vyviez ich ź Biełarusi na pačatku vajny. Ženia pajechaŭ za kampaniju — z Čarnahoryi jon źbiraŭsia paśla dabracca ŭ Polšču.
Chłopcy trapili ŭ avaryju niedaloka ad rumynskaha horada Insurecej. Hruzavik pad kiravańniem 51-hadovaha miascovaha žychara raptam vyjechaŭ na sustrečnuju pałasu i ŭrezaŭsia ŭ aŭto ź biełarusami łob u łob.
«Naša Niva» — bastyjon biełaruščyny
PADTRYMAĆ«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary