«Troch maich katoŭ addali nazaŭsiody». Natalla Chierše źbirajecca vykupić adnaho z hadavancaŭ
Byłaja palitźniavolenaja Natalla Chierše źbiraje hrošy na vykup kata. Jana padzialiłasia historyjaj, jak, viarnuŭšysia ŭ Šviejcaryju, zastałasia biez rečaŭ i lubimych «brytancaŭ».
Voś dopis, jaki apublikavała žančyna na kraŭdfandynhavaj płatformie GoFundMe:
«Paśla 1,5 hoda palityčnaha źniavoleńnia ŭ Biełarusi, ja viarnułasia ŭ Šviejcaryju 18 lutaha 2022 hoda. Za hety čas mianie vysielili z kvatery, a rečy zabrali. Tolki niekalki ź ich zastalisia ŭ majoj ułasnaści.
Samaje vialikaja biada dla mianie — što maich troch brytanskich katoŭ addali nazaŭsiody. Ja nie mahu z hetym źmirycca.
Lili i Simba — u žančyny ź Jonšvila. Moj pamierły muž padaryŭ mnie hetych dvuch katoŭ u 2009 hodzie. Jany žyli sa mnoj doŭhi čas i dapamahli mnie prajści praź niekalki žyćciovych kryzisaŭ.
Na žal, žančyna abyjakavaja da majoj historyi i zastajecca bieskampramisnaj. Jana kupiła katoŭ u minułym vieraśni za sto frankaŭ. Ciapier u jaje čatyry katy. Jana nie pakidaje mnie šancaŭ, i ŭ mianie niama siłaŭ zmahacca.
Mnie ŭdałosia znajści kampramis z druhim haspadarom z Arbona. Jaho hałoŭnaje patrabavańnie — atrymać hrošy na novaha «brytanca».
Ź lutaha 2021 hoda ja žyvu na piensiju ŭdavy i źbieražeńni, taksama ŭ mianie jość dačka, jakoj patrabujecca padtrymka, tamu ja nie viedaju, jakim budzie majo finansavaje stanovišča ŭ budučyni.
Tamu ja źbiraju tut 1425 frankaŭ (kala 1490 dalaraŭ. — NN), kab vykupić svajho kata. Vielmi spadziavajusia na vašu dapamohu, kab jak maha chutčej uziać na ruki svaju Šanel.
Pa rašeńni suda ja mušu ŭnieści hrošy da 18 žniŭnia».
Natalla Chierše — biełaruska sa šviejcarskim hramadzianstvam. Jaje asudzili za sarvanuju ź siłavika bałakłavu. 18 miesiacaŭ žančyna praviała za kratami.
Čytajcie taksama:
«Pad hałavu časam kłała abutak, bo nie mieła ni paduški, ni matraca». Intervju z Natallaj Chierše — pra kałoniju, muža i niepachisnaść
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary