Jak daviedaŭsia Biełaruski rasśledavalnicki centr, jašče ŭ 2020 hodzie tavarny znak «Biełkosmas» byŭ zarehistravany ŭ Biełarusi na imia Alaksandra Mikałajeviča Zajcava. Poŭny ciozka hetaha čałavieka źjaŭlajecca saŭładalnikam kampanii «Bremina hrup» i trapiŭ pad sankcyi ES i ZŠA jak «kašalok» Łukašenki. Majuć dačynieńnie da kaśmičnych spraŭ i inšyja praŭładnyja bujnyja biznesmieny.
Jość u biełaruskim rejestry i firma TAA «Kaśmičnaje ahienctva «Biełkosmas», jakaja viadzie dziejnaść u halinie kampjutarnaha prahramavańnia i taksama źviazanaja z Zajcavym. Praŭda, ciapier jon de-jure ŭžo nie źjaŭlajecca saŭładalnikam firmy, ale adzin z supracoŭnikaŭ firmy paćvierdziŭ, što ŭskosna jon jašče ŭpłyvaje na spravy kampanii.
Papiarednija ŭładalniki i kiraŭniki TAA «Kaśmičnaje ahienctva «Biełkosmas» taksama afilavanyja z Zajcavym i «Bremina hrup». Z 2017 da 2019 im kiravaŭ Andrej Vasiljevič Dziemianciej — syn Vasila Dziemiancieja, byłoha namieśnika staršyni KDB i kiraŭnika «Bremina hrup», a ŭ 2015—2019 saŭładalnikam «ahienctva» byŭ Filip Baranaŭ, były kiraŭnik kampanii «Kidma tek», u jakoj Zajcaŭ byŭ saŭładalnikam praz svaju emirackuju kampaniju SOHRA Overseas FZE. U 2019 hodzie Filipa Baranava ŭ saŭładalnikach «Biełkosmasa» zamianiła žonka Iryna.
Ofis kampanii «Biełkosmas» u Minsku da siaredziny vosieni minułaha hoda znachodziŭsia pa adrasie Niamiha, 40. Pa hetym ža adrasie byli «prapisanyja» takija viadomyja kampanii «kašalkoŭ» Łukašenki, jak «Hłobałkastam», źviazany ź Viktaram Šejmanam, NNK Mikałaja Varabja i Alaksandra Zajcava.
Kamientary