BiełTA pakazała jašče adnaho imaviernaha pierajemnika Makieja
Siarhiej Račkoŭ — čałaviek sistemy. I čałaviek Natalli Kačanavaj.
Łukašenkaŭskaja sistema zakrytaja. U joj, u praciah tradycyj Savieckaha Sajuza, zdahadvacca ab unutranych pracesach davodzicca pa namiokach aficyjnych ŚMI. I ŭčora BiełTA dało tłusty fotanamiok na fihuru pierajemnika Uładzimira Makieja. Dva jahonyja namieśniki — Siarhiej Alejnik i Jaŭhien Šastakoŭ — supravadžali na cyrymonii małaviadomaha šyrokaj publicy mužčynu z apuščanymi ŭniz končykami vusnaŭ i ciažkim pozirkam. I mienavita jaho fota raspaŭsiudziła dziaržaŭnaje ahienctva.
U eskorcie dvuch namieśnikaŭ ministra zamiežnych spraŭ na raźvitańnie z Makiejem pryjšoŭ Siarhiej Račkoŭ. Hety małaviadomy šyrokaj publicy dypłamat zbliziŭsia z Natallaj Kačanavaj, zajmajučy pazicyju staršyni pastajannaj kamisii Savieta Respubliki pa mižnarodnych spravach i nacyjanalnaj biaśpiecy.
Da svajho pryznačeńnia ŭ Sienat u 2019-m Račkoŭ paśpieŭ papracavać časovym pavieranym u ZŠA, namieśnikam stałaha pradstaŭnika Biełarusi ŭ AAN, načalnikam adździełaŭ u MZS, pasłom u niekatorych musulmanskich krainach. Pracavaŭ i ŭ AAN. Na dypłamatyčnuju słužbu jon pryjšoŭ z bankaŭskaj sistemy, a da taho vykładaŭ u Linhvistyčnym univiersitecie, dzie abaraniŭ dysiertacyju pa piedahohicy.
Viadoma, što Natalla Kačanava aktyŭna rasstaŭlaje svaich ludziej na adkaznyja pasady.
Račkova charaktaryzujuć jak «čałavieka sistemy».
«Chto na piasčany karjer?» — «Ja!» — «Chto na cemientny zavod?» — «Ja!» Voś Račkoŭ taki čałaviek. Budzie rabić usio, što zachoča načalstva», — skazaŭ «Našaj Nivie» adzin z čynoŭnikaŭ.
«Kali jaho pryznačać, to Ministerstva zamiežnych spraŭ pieramieścicca bližej da vulicy Čyrvonaarmiejskaj, da Savieta Respubliki, da Kačanavaj,
jana budzie ŭpłyvać na rašeńni pa zvykłaj joj madeli: kali niešta atrymałasia, to heta my pastaralisia, kali niejki pravał — heta vykanaŭcy na miescach naparoli», — tłumačyć «Našaj Nivie» daśviedčany surazmoŭca.
Na dumku hetaha surazmoŭcy, Račkoŭ maje nie mienšyja šancy na kresła ministra, čym namieśnik kiraŭnika Administracyi prezidenta Maksim Ryžankoŭ, namieśnik ministra zamiežnych spraŭ Siarhiej Alejnik ci pradstaŭnik Biełarusi pry AAN Valancin Rybakoŭ. Varta adznačyć, što Ryžankoŭ — daŭni apanient Kačanavaj u kułuarnaj baraćbie.
Račkovu 62 hady.
Čytajcie taksama: Stali viadomyja kandydatury na zamienu niezamiennaha ministra
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary