Stała viadoma, čamu HUBAZiKu zahadali bolš nie pakazvać prynižalnyja videa
Siońnia zranku ŭ biełaruskaj infarmprastory źjaviłasia niečakanaja navina. Kanał siłavikoŭ, jaki rehularna publikavaŭ i smakavaŭ videa z zatrymanymi pa palityčnych mierkavańniach na fonie dźviarej, anansavaŭ, što «źmianiaje farmat publičnaj padačy infarmacyi». I nadalej kali takija videa kali i buduć źjaŭlacca, to pa minimumie. Prosta tak u łukašenkaŭskaj sistemie ničoha nie byvaje, i tamu my pastaralisia razabracca, što za hetym staić.
Siłaviki dva hady vystaŭlali prynižalnyja videa sa svaimi achviarami — časam sa śladami katavańniaŭ abo ździekaŭ.
Videa byli zmanciravanyja, kab vystavić represavanych u kiepskim śviatle, i supravadžalisia ździeklivymi kamientarami.
Niekatoryja pabačyli ŭ zajavie znak mahčymaha ścišeńnia tempaŭ represiŭnaha kanviejera. Pa infarmacyi «Našaj Nivy», pryčyna inšaja.
Łukašenkaŭcy ŭsie apošnija hady nastojliva namahalisia maksimalna abmiežavać mahčymaści ŚMI i pravaabarončych arhanizacyj atrymlivać infarmacyju pra toje, što adbyvajecca ŭ Biełarusi, u tym liku i ŭ halinie represij. U takoj situacyi videa z zatrymanymi stali važnaj krynicaj infarmacyi.
Viadoma, što łukašenkaŭcy mietadyčna apracoŭvajuć zatrymanych, ich siemji, a taksama vyzvalenych palitviaźniaŭ, kab jany ničoha nie raskazvali žurnalistam i pravaabaroncam.
Represavanych i ich svajakoŭ padmanvajuć, što, kali rozhałas pra spravu šyroka nie paniasiecca, to nastupstvy buduć bolš miakkimi. Zvyčajna hetyja spadziavańni nie spraŭdžvajucca.
Łukašenkaŭcy taksama da krajnaści abmiežavali pracu advakataŭ.
Im zabaraniajuć paviedamlać navat artykuły, pa jakich abvinavačvajucca ich padabaronnyja.
U takich umovach akurat videa HUBAZiKa apošnim časam stali adnoj z krynic infarmacyi pra zatrymańni.
Mienavita paśla ich publikacyi, u tym liku i «Našaj Nivie», niaredka ŭdavałasia daviedacca pra los niejkich ludziej i navat pa hetych nitačkach razmotvać kłubok cełych «śpiecapieracyj».
U kiraŭnictvie karnych struktur pryjšli da vysnovy, što hetyja videa nanosili sistemie bolš škody, čym karyści.
Jany nieśli funkcyju zastrašvańnia, ale paralelna jany davali infarmacyju pra kolkaść i imiony represavanych, a taksama pra mietady zatrymańniaŭ i śledstva.
Takuju praktyku vyrašyli spynić — da žalu niekatorych niepasrednych vykanaŭcaŭ, jakija atrymlivali zadavalnieńnie ad publičnaha prynižeńnia ludziej.
Možna mierkavać, što zaraz zatrymańni i katavańni buduć praciahvacca jak i raniej — ale cicha. Praz heta nie budzie nastolki kidacca ŭ vočy maštab represij i biesčałaviečnaje staŭleńnie siłavikoŭ da ludziej.
Łukašenkaŭskaja viarchuška choča, kab stała jak pry Stalinie: źnik čałaviek — i cišynia.
Heta stavić novyja vykliki pierad pravaabaroncami i žurnalistami.
«Pra realnuju źmienu palityki buduć śviedčyć tolki kadravyja pieramieny na klučavych pazicyjach, a taksama vyzvaleńnie palitviaźniaŭ i spynieńnie aryštaŭ. Navat kali Łukašenka i zachoča pradać Zachadu kaśmietyčnyja miery kštałtu spynieńnia pakazu aryštavanych, na heta nie varta kuplacca», — skazaŭ «Našaj Nivie» na ŭmovach ananimnaści supracoŭnik dziaržaŭnaha aparata.
Kali vy viedajecie bolš, napišycie redaktaru «Našaj Nivy» ŭ TH @nn_editor, na [email protected] ci [email protected]. Kali pišacie ŭ TH, vydalajcie čat paśla suviazi. Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
«Naša Niva» — bastyjon biełaruščyny
PADTRYMAĆ
Kamientary