Paŭnočnaja Kareja ranicaj 31 śniežnia zrabiła zapusk troch balistyčnych rakiet małoj dalokaści ŭ bok Japonskaha mora.
Pra heta paviedamlaje paŭdniovakarejskaje infarmahienctva «Ronchap» sa spasyłkaj na zajavu Abjadnanaha kamiteta načalnikaŭ štaboŭ Paŭdniovaj Karei, piša DW.
Pa źviestkach ahienctva, zapuski byli zrobleny z pravincyi KNDR Chvanche-Pukto, raźmieščanaj na poŭdzień ad stalicy krainy Pchieńjana. Rakiety pralacieli kala 350 km, paśla čaho ŭpali ŭ mora, paviedamili Paŭdniovaja Kareja i Minabarony Japonii.
Rada biaśpieki AAN svajoj rezalucyjaj zabaraniła Pchieńjanu ździajśniać zapuski balistyčnych rakiet luboj dalokaści. Takija rakiety ŭ zaležnaści ad typu zdolnyja nieści jadziernyja zarady.
Miž tym za apošni čas KNDR nieadnarazova pravodziła zapuski balistyčnych rakiet u parušeńnie hetaj rezalucyi. Pa danych ahienctva «Ronchap», u 2022 hodzie kolkaść takich zapuskaŭ skłała 70, u tym liku vosiem mižkantynientalnych balistyčnych rakiet.
Zapusk 31 śniežnia adbyŭsia praź dzień paśla taho, jak ministerstva abarony Paŭdniovaj Karei abjaviła ab paśpiachovym vyprabavańni ćviordapaliŭnaj rakiety-nośbita.
Reakcyi na zapusk KNDR balistyčnych rakiet
U Abjadnanym kamitecie načalnikaŭ štaboŭ Paŭdniovaj Karei pusk rakiet 31 śniežnia nazvali surjoznaj pravakacyjaj, jakaja padryvaje mir i stabilnaść na Karejskim paŭvostravie, a taksama ŭ mižnarodnaj supolnaści.
Miž tym ZŠA zajavili, što zapuski nie ŭjaŭlali niepasrednaj pahrozy hramadzianam ZŠA, ich terytoryi abo sajuźnikam.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?1111
Kamientary