Pieršy, chto paviedamiŭ Zialenskamu pra rasijskaje ŭvarvańnie. Što viadoma pra ministra ŭnutranych spraŭ Ukrainy, jaki raźbiŭsia na viertalocie pad Kijevam
Pry padzieńni viertalota ŭ Bravarach zahinuła kiraŭnictva Ministerstva ŭnutranych spraŭ Ukrainy. Na borcie byŭ i ministr Dzianis Manastyrski. Raskazvajem pra jaho asobu.
Karjera palityka i ministra
Dzianisu Manastyrskamu było 42 hady. Pasadu ministra ŭnutranych spraŭ jon zajmaŭ z 16 lipienia 2021-ha. U ministerskim kreśle jon zamianiŭ Arsiena Avakava, jaki siem hadoŭ kiravaŭ viedamstvam i syšoŭ u adstaŭku.
Manastyrski adroźnivaŭsia ad svajho papiarednika stylem kiravańnia i davaŭ słužbam i viedamstvam pad svaim kryłom aŭtanomiju.
Ministr byŭ rodam z Chmialnickaha. Skončyŭ jurydyčny fakultet Chmialnickaha ŭniviersiteta kiravańnia i prava. Vučyŭsia ŭ Instytucie dziaržavy i prava Nacyjanalnaj akademii navuk. Jon kandydat jurydyčnych navuk. A taksama aŭtar 25 navukovych prac i troch padručnikaŭ pa pytańniach jurysprudencyi.
Da svajoj palityčnaj karjery Manastyrski pracavaŭ u roznych kampanijach. U 2007 hodzie byŭ jurystam u Hillmont Partners, jakaja ažyćciaŭlała jurydyčnaje supravadžeńnie kampanii «Kvartał-95», adnym z zasnavalnikam jakoj byŭ Uładzimir Zialenski.
Pracavaŭ taksama ŭ analityčnym centry «Ukrainski instytut budučyni» — hramadskaj arhanizacyi, źviazanaj z Antonam Hieraščankam.
Paźniej Manastyrski byŭ pamočnikam deputata Hieraščanki. A ŭ 2019-m byŭ abrany ŭ Viarchoŭnuju Radu ad partyi «Słuha naroda». Jon kiravaŭ u joj kamitetam pa pravaachoŭnaj dziejnaści.
Vajna Rasii suprać Ukrainy
U intervju Washington Post Manastyrski zhadvaŭ, što byŭ pieršym, chto 24 lutaha paviedamiŭ Zialenskamu, što rasijskija vojski raspačali masavy nastup na ŭkrainskuju terytoryju.
Kali vajna pačałasia, ministr zajmaŭsia rasśledavańniem vajennych złačynstvaŭ. Pavodle jaho, za paŭtara miesiaca vajny było zarehistravana bolš za 10 tysiač kryminalnych vytvorčaściej pa fakcie złačynstvaŭ rasijskich vajskoŭcaŭ i ich pamahatych.
Manastyrski naładžvaŭ dyjałoh ź ministrami ŭnutranych spraŭ krain Jeŭrapiejskaha Sajuza, a taksama z Turcyjaj, kab evakujavanyja ŭkraincy atrymlivali ŭsiu nieabchodnuju dapamohu.
Jon padtrymlivaŭ zachady pa ŭmacavańni miažy ź Biełaruśsiu.
«Siońnia, viadoma, my aktyvizujem rabotu ŭ pryhraničnych z Respublikaj Biełaruś rajonach. My čujem sihnały ab mahčymaści nastupu dyviersijna-raźviedvalnickich hrup mienavita z hetaj terytoryi, tamu ŭzmocnienaja praca Nacyjanalnaj palicyi, Uzbrojenych sił, Słužby biaśpieki Ukrainy i inšych orhanaŭ, jakija siońnia adkazvajuć za biaśpieku», — kazaŭ jon u lipieni.
23 žniŭnia 2022 hoda Manastyrski byŭ uznaharodžany ordenam «Za zasłuhi» III stupieni za ŭmacavańnie ŭkrainskaj dziaržaŭnaści.
Pryvatnaje žyćcio
U ministra zastałosia dvoje synoŭ.
Jaho žonka Žanna Manastyrskaja pracuje načalnicaj adździeła pradstaŭnictva i sudova-analityčnaj pracy ŭ Dziaržaŭnym biuro rasśledavańniaŭ.
Syny razam z baćkam praktykavali aktyŭny adpačynak i lubili pieśni Uładzimira Vysockaha.
Manastyrski staranna abierahaŭ svaju reputacyju, bo sproby znajści kampramat na hramadskaha dziejača rabilisia nie adzin raz, pišuć ukrainskija miedyja.
U lutym 2021 hoda Manastyrskaha, na toj momant deputata, sprabavali ŭciahnuć u skandał z-za nabyćcia kvatery ŭ Kijevie płoščaj 97,4 kv. m za 100 tysiač dalaraŭ.
Adnak pradstaŭlenyja dekłaracyi ničoha złačynnaha nie vyjavili. Manastyrski davioŭ, što nieruchomaść kupiŭ paśla taho, jak była pradadziena ŭsia jaho majomaść u Chmialnickim.
Usiaho ŭ vyniku padzieńnia viertalota ŭ Bravarach zahinuła 14 čałaviek, u tym liku adno dzicia.
Pad Kijevam viertalot upaŭ na dziciačy sadok. Zahinuła kiraŭnictva Ministerstva ŭnutranych spraŭ
SBU nazvała try viersii avijakatastrofy ŭ Bravarach
Jak nasamreč mianiali Miedźviedčuka i kamandziraŭ «Azova». Nieviadomyja padrabiaznaści
«Naša Niva» — bastyjon biełaruščyny
PADTRYMAĆ«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary