My ŭžo raskazvali pra cikavyja biełaruskija staronki ŭ tyktoku i jutubie. Siońnia prapanujem vašaj uvazie śpis niezvyčajnych akaŭntaŭ ad jarkich biełarusaŭ u instahramie: tut i miłyja lalki, i tajamničyja niačyściki, i dyjalektnyja słoŭcy.
Interjery biełaruskich chat / belarus_traditional_interior
Hetamu fotaprajektu pra chaty z usioj Biełarusi, jakija nie kranuŭ jeŭraramont, spaŭniajecca piać hadoŭ. Razam z ubrańniem chat tut demanstrujuć ich haspadyń, a taksama raskazvajuć nievialičkija historyi pra vioski, dzie zroblenyja fota.
Naprykład, vas paznajomiać z žycharkami vioski Danilevičy, što blizka da Lelčycaŭ, dzie žyvuć biełaruskija šaptuchi, abo z paleskaj vioskaj Černicy niedaloka ad mierkavanaha miesca pachavańnia Kiryły Turaŭskaha. Usie hetyja chatki, babuli, łavy dy harbuzy źniatyja ź vialikaj piaščotaj.
Biełaruskija niačyściki / Belarusian_Monsters
Biełaruskaja demanałohija, mifałohija i falkłor u interpretacyi haradzienskaha ilustratara. Na hetaj staroncy partrety niačyścikaŭ supravadžajucca ich historyjami.
Tut nie tolki Piarun dy Svaroh, jakich vy možacie pamiatać sa škoły, ale i mnostva čarciej, duchaŭ, karlikaŭ i demanaŭ z hłybini biełaruskaj kultury.
Hanna Zabrocka / haniamade
Hety natchnialny akaŭnt viadzie mastačka Hanna Zabrockaja. Jana pašyła svaju pieršuju lalku niekalki hadoŭ tamu, kali čakała dzicia i chacieła, kab novanarodžanaja dziaŭčynka hulała z cackaj, stvoranaj rukami matuli. Pieratvaryłasia hetaja zaduma ŭ bahaćcie lalek roznych koleraŭ i farmataŭ, jakija Hanna ciapier vystaŭlaje na ŭłasnaj staroncy.
Hanna adhukajecca na tryvožnyja naviny ź Biełarusi. Naprykład, stvaryła lalek Śviatłany Cichanoŭskaj, Maryi Kaleśnikavaj, Volhi Chižynkovaj i Niny Bahinskaj i pierasłała ich samim viadomym biełaruskam (dzie heta było mahčyma).
Palavaja pošta / poshtabel
Kadry ŭ «Palavoj pošcie» ŭnikalnyja, bo heta zdymki Biełarusi pieršaj pałovy XX stahodździa ŭ paraŭnańni z kadrami tych ža miaścin siońnia.
Naŭrad ci vy niekali bačyli takija Vaŭkavysk, Baranavičy, Mahiloŭ, Pružany i Baruny (i nie tolki!). Sutnaść nie tolki ŭ budynkach, jakija ciapier vyhladajuć inakš abo ŭvohule źniesienyja. Sutnaść i ŭ atmaśfiery starych miastečak i haradkoŭ, jakuju pieradajuć hetyja zdymki.
Siabruju ź biełaruskaj movaj / siabryclub
Staronka adnoj ź biełaruskich supolnaściej ZŠA budzie cikavaja i tym biełarusam, chto nie maje da Amieryki nijakaha dačynieńnia. Usio praz toje, što aŭtary jaje aktyŭna publikujuć biełaruskuju paeziju i dadajuć da jaje pryhožyja fotazdymki — zadavalnieńnie i dla dušy, i dla vačej.
Kali-nikali, adnak, aŭtaraŭ staronki cikavić i proza: tak, jany drukavali cytaty z aŭtabijahrafii movaznaŭcy Piatra Sadoŭskaha, a časam i prosta prykazki i narodnyja mudraści. Karaciej, toje, što treba, kali chočacie troški samaadukacyi ŭ volnuju chvilinku.
Biełaruskaja mova. Etnahrafija / bielaruskija_havorki
Biełaruskaja mova na provadzie, kažuć stvaralniki hetaj staronki. Trapnyja słoŭcy ź biełaruskich havorak jany razbaŭlajuć biełaruskimi vieršami.
Nie pužajciesia, heta zusim nie nudny školny słoŭnik, a chutčej mahčymaść u nienazojlivaj formie paznajomicca ź leksikaj, jakuju vy naŭrad ci jašče b niedzie sustreli. Zabiahač, boŭdziła, dziudzik, dryvotnia — śviet najbahaciejšaj movy.
«Naša Niva» — bastyjon biełaruščyny
PADTRYMAĆDzieviać mabilnych prahram, jakija pavialičać kolkaść biełaruskamoŭnaha kantentu ŭ vašym žyćci
Šeść biełaruskamoŭnych tyktokaŭ, pra jakija vy mahli nie viedać
Jak pieravieści sacsietki i miesiendžary na biełaruskuju movu
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary