Rasijskuju armiju płanujuć papoŭnić 400 tysiačami kantraktnikaŭ

Adrazu niekalki rehijanalnych ŚMI publikujuć ahulnuju ličbu kantraktnikaŭ, jakimi, pa płanach Minabarony, nieabchodna papoŭnić vojski — 400 tysiač, piša «Radyjo Svaboda».

Śćviardžajecca, što asnoŭnaja častka pracy laža na supracoŭnikaŭ vajskovych kamisaryjataŭ, a ŭ kančatkovym vyniku adkazvać za vykanańnie płana buduć hubiernatary. Pa płanach Minabarony, u Čalabinskaj i Śviardłoŭskaj abłaściach na prafiesijnuju słužbu pavinny pastupić pa 10 tysiač čałaviek, u Piermskim krai — 9 tysiač.

Paviedamlajecca taksama, što ŭ aŭtorak žycharam Varoniežskaj vobłaści znoŭ pačali ŭručać pozvy ŭ vajenkamaty, jak heta było ŭ vieraśni minułaha hoda paśla abvieščanaj Uładzimiram Pucinym tak zvanaj «častkovaj mabilizacyi». Ułady rehijona śćviardžajuć, što heta robicca «vyklučna dla aktualizacyi danych voinskaha ŭliku».

Vajenkamaty sprabujuć kampiensavać straty rasijskaha vojska ŭ deficytnych vajskovych śpiecyjalnaściach, ciapier heta kiroŭcy broniemašyn i artylerysty. U svaju čarhu pres-sakratar prezidenta Rasii Dźmitryj Piaskoŭ adchiliŭ, jak i raniej, płany pa praviadzieńni druhoj chvali mabilizacyi. «U Kramli niama takich abmierkavańniaŭ», — zajaviŭ Piaskoŭ.

Čutki pra pačatak druhoj chvali mabilizacyi ŭ Rasii ŭ suviazi ź niedachopam žyvoj siły dla praciahu poŭnamaštabnaj vajny va Ukrainie pieryjadyčna źjaŭlajucca ŭ ŚMI z kanca minułaha hoda. Ab praviadzieńni padobnych mierapryjemstvaŭ papiaredžvali, u pryvatnaści, raźviedki niekalkich zachodnich krain i ŭłady Ukrainy. U Kramli admaŭlali i admaŭlajuć hetyja płany.

Pavodle aficyjnych źviestak, ź vieraśnia minułaha hoda ŭ ramkach «častkovaj mabilizacyi» na vajskovuju słužbu pryzvali zvyš 330 tysiač rasijanaŭ, jakija znachodziacca ŭ zapasie. U kancy kastryčnika ministr abarony Rasii Siarhiej Šajhu daŭ spravazdaču ab zaviaršeńni mabilizacyi. Paśla hetaha Pucin taksama abviaściŭ pra zakančeńnie pryzyvu, adnak nie padpisaŭ adpaviednaha ŭkaza. Takim čynam, aficyjna mabilizacyja ŭ Rasii praciahvajecca.

U studzieni ministr abarony Rasii Siarhiej Šajhu abviaściŭ ab zadačy pavialičyć kolkaść rasijskaha vojska da paŭtara miljona čałaviek na praciahu troch hadoŭ. Miarkujecca, što amal pałova ź ich budzie kantraktnikami. Razam z tym napiaredadni ŭ Dziarždumu byŭ uniesieny zakonaprajekt ab pavyšeńni hraničnaha ŭzrostu słužby ŭ pryzyŭnoj armii z 27 da 30 hadoŭ.

• 0
• 0
• 3
• 5
• 0
• 0
• 9
• 0