4G-internet pavinien źjavicca na Miesiacy da kanca hetaha hoda
4G-sietka ad kampanii Nokia budzie vykarystoŭvacca ŭ ramkach misii NASA «Artemis-1», metaj jakoj stanie adpraŭka ludziej na pavierchniu Miesiaca ŭpieršyniu z 1972 hoda.
Finskaja telekamunikacyjnaja hrupa Nokia płanuje zapuścić sietku na rakiecie SpaceX u bližejšyja miesiacy, paviedamiŭ žurnalistam Łuis Maestra Ruis De Temina, hałoŭny inžynier Nokia, padčas niadaŭniaj vystavy Mobile World Congress u Barsiełonie.
Nokia zajaŭlaje, što technałohija raspracavana, kab vytrymlivać ekstremalnyja ŭmovy kosmasu. Kampanija choča pakazać, što ziamnyja sietki mohuć zadavolić kamunikacyjnyja patreby dla budučych kaśmičnych misij: astranaŭty zmohuć kamunikavać adzin z adnym i z orhanami kiravańnia misijaj, dystancyjna kiravać miesiacachodam i tranślavać videa i danyja telemietryi na Ziamlu ŭ režymie realnaha času.
Sietka budzie siłkavacca ad abstalavanaj antenaj bazavaj stancyi, jakaja budzie zachoŭvacca ŭ miesiacovym pasadačnym aparacie Nova-C, sprajektavanym amierykanskaj kaśmičnaj kampanijaj Intuitive Machines, a taksama ad spadarožnaha miesiacachoda na soniečnych batarejach. Pamiž pasadačnym aparatam i miesiacachodam budzie ŭstanoŭlena LTE-złučeńnie.
Usia hetaja infrastruktura pryziamlicca (ci chutčej prymiesiačycca) ŭ rajonie kratara Šekłtan, jaki znachodzicca ŭzdoŭž paŭdniovaha limba Miesiaca (bačnaha kraju dyska Miesiaca), paviedamlaje CNBC. Choć pasadačny aparat i budzie zapuščany z dapamohaj rakiety SpaceX, ale sam pasadačny modul na pavierchniu Miesiaca budzie dastaŭleny dziakujučy ŭłasnaj ruchalnaj sistemie, jakaja i dapamoža jamu zaviaršyć padarožža.
Aproč zabieśpiačeńnia pieradačy danych, dystancyjnaha kiravańnia miesiacachodami, navihacyi ŭ režymie realnaha času i pieradačy strumienievaha videa vysokaj razroznaści, adnoj ź inšych metaŭ kampanii źjaŭlajecca pošuk miesiacovaha lodu. Choć bolšaja častka pavierchni Miesiaca suchaja, niadaŭnija bieśpiłotnyja misii pryviali da adkryćcia reštkaŭ lodu, zamknionych u abaronienych kratarach vakoł polusaŭ.
Takuju vadu možna apracoŭvać i vykarystoŭvać dla pićcia, rasščaplać na vadarod i kisłarod dla vykarystańnia ŭ jakaści rakietnaha paliva abo raździalać, kab zabiaśpiečvać astranaŭtaŭ prydatnym dla dychańnia kisłarodam.
Zapłanavanaja misija stanie surjoznym vyprabavańniem mahčymaściaŭ pierad pačatkam vierahodnaha kamiercyjnaha vykarystańnia Miesiaca i mahčymych budučych hornazdabyŭnych rabot, dla jakich nieabchodna najaŭnaść surjoznaj infrastruktury i pravilnych danych ab znachodžańni peŭnych resursaŭ. Tamu całkam mažliva, što padklučeńnie Miesiaca da Internetu stanie adnym ź pieršych krokaŭ na šlachu dla budučych ekśpiedycyj, bo mašynabudaŭničy hihant Rolls Royce, naprykład, užo płanuje budaŭnictva jadziernaha reaktara dla zabieśpiačeńnia enierhijaj budučych daśledčykaŭ i nasielnikaŭ našaha adzinaha naturalnaha spadarožnika.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary