Kniha biełaruskaj błohierki, jakaja zmahałasia z rakam, bje rekordy prodažaŭ
Kniha «Ranica nadychodzić zaŭsiody» ad błohierki Nadziei Mialeški pastupiła ŭ prodaž u krasaviku hetaha hoda z nakładam 15 tysiač asobnikaŭ. Pieršuju partyju raskupili praktyčna adrazu. Na ciapierašni momant vydańnie bje rekordy pa papularnaści ŭ kniharniach, piša «Anłajnier».
Nadzieja Mialeška — viadomy biełaruski błohier i zasnavalnica škoły markietynhu. Jana zmahałasia z ahresiŭnym rakam małočnaj załozy z 2020 hoda i adkryta dzialiłasia svajoj historyjaj u instahram, na jaki byli padpisanyja kala paŭmiljona čałaviek.
U sakaviku hetaha hoda stała viadoma pra śmierć Nadziei, a praź niekalki tydniaŭ źjaviłasia navina ab vychadzie ŭ śviet knihi.
«Ja tak škaduju, što jana nie paśpieła ŭziać jaje ŭ ruki», — napisaŭ muž błohierki, eks-chakieist zbornaj Biełarusi Dźmitryj Mialeška. U instahram jon vykłaŭ karotki post Nadziei, jaki byŭ padrychtavany zahadzia.
U im biełaruska pryznaje, što kniha, chutčej za ŭsio, vyjdzie ŭ druk užo paśla jaje śmierci, i nahadvaje budučym čytačam pra kaštoŭnaść kožnaha dnia: «Usie my kančatkovyja, i ja kažu heta biez horyčy. Hetaja dumka vyćviarežvaje i dazvalaje inakš ubačyć kaštoŭnaść kožnaha dnia. Niama nijakich čarnavikoŭ, repietycyj, usio, što my pišam, stvarajem, adčuvajem siońnia, — užo naša žyćcio, užo čystavik».
«Kniha Nadziei» chutka akazałasia ŭ topie prodažaŭ: ź pieršych dzion popyt na jaje byŭ kałasalnym. Pradali ŭžo bolš za 15 tysiač ekzemplaraŭ.
«My daŭno z takim nie sutykalisia, — adznačyli ŭ sietcy kniharniaŭ OZ. — Daviałosia śpiešna zrabić bujnuju zamovu ŭ vydaviectvie i zabiaśpiečyć pastaŭki novaj partyi. Pry hetym kniha zastajecca vielmi papularnaj užo niekalki miesiacaŭ. Bolš za toje, jana rezka ŭzmacniła cikavaść da knih-miedytacyj i litaratury pa papularnaj psichałohii. Ciapier usio čaściej šukajuć knihi, jakija b mahli padkazać adkazy na žyćciovyja pytańni. I mnohija vybirajuć biełaruskich aŭtaraŭ».
Na druhim miescy ŭ rejtynhu samych papularnych knih u biełarusaŭ (pa viersii OZ) akazałasia jašče adna kniha-miedytacyja — «Da siabie piaščotna. Kniha pra toje, jak šanavać i bierahčy siabie». Jaje aŭtar Volha Prymačenka taksama ź Biełarusi, dakładniej — ź Minska. Jana piša pra toje, jak prymać svaje pačućci, rasstaŭlać pryjarytety i navučycca adčuvać piaščotu da siabie.
Darečy, hetuju knihu pryznali bestseleram i ŭ Rasii. Jaje nazvali lidaram prodažaŭ na «Litresie» ŭ 2022 hodzie. Parady pa psichałohii ad biełaruskaha aŭtara apiaredzili navat viadomuju antyŭtopiju «1984» ad Džordža Orueła.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary