U sudzie Horackaha rajona 25 lipienia palitviaźnia Aleha Jafremienku asudzili ŭžo pavodle treciaj kryminalnaj spravy. Jaho znoŭ abvinavacili pa č. 1 art. 411 Kryminalnaha kodeksa (złosnaje niepadparadkavańnie patrabavańniam administracyi papraŭčaj ustanovy). Sudździa Alena Varabjova pryznačyła Alehu jašče adzin hod źniavoleńnia, piša «Viasna».
Aleh Jafremienka
Raniej Alehu Jafremienku ŭžo ŭzmacniali režym: u vieraśni 2021 hoda z kałonii, dzie jon adbyvaŭ termin za toje, što ŭdaryŭ milicyjanta pa nahach, Aleha pieraviali na turemny režym u Mahiloŭ, a letaś dadali hod kałonii za «niepadparadkavańnie» administracyi mahiloŭskaj turmy.
Aleh Jafremienka — žychar Viciebska, jakoha ŭžo bolš za dva hady i 10 miesiacaŭ utrymlivajuć za kratami. 9 śniežnia 2020 hoda jaho asudzili pa artykule ab hvałcie nad supracoŭnikam MUS (art. 364 KK). Jafremienku abvinavacili ŭ tym, što jon udaryŭ milicyjanta pa nahach padčas vuličnaha šeścia 13 vieraśnia 2020 hoda — toj upaŭ i padrapaŭ dałoni.
Sud tady pryznačyŭ Alehu čatyry z pałovaj hady kałonii. Adbyvać termin jaho nakiravali ŭ mahiloŭskuju kałoniju № 15. Ale praź niekalki miesiacaŭ jamu ŭzmacnili pakarańnie i pieraviali na turemny režym.
Inicyjataram zaviadzieńnia novaj kryminalnaj spravy stała administracyja mahiloŭskaj turmy № 4. Tam Aleha rehularna źmiaščali ŭ ŠIZA z nadumanych pryčyn.
15 žniŭnia 2022 hoda sudździa Viktoryja Palakova prysudziła Alehu ŭ dadatak da čatyroch z pałovaj hadoŭ kałonii jašče hod u źniavoleńni.
Z 18 listapada 2022 hoda Aleh pačaŭ adbyvać termin u papraŭčaj kałonii № 9 u Horkach. Pa infarmacyi pravaabaroncaŭ, administracyja ŭstanovy ŭvieś čas cisnuła na jaho. Jaho nieadnarazova źmiaščali ŭ ŠIZA, a niadaŭna zaviali ŭžo treciuju kryminalnuju spravu — znoŭ pa č. 1 art. 411 KK.
Treci sud nad Aleham adbyŭsia 25 lipienia. Spravu razhladała sudździa Horackaha rajona Alena Varabjova. Jana pryznała palitviaźnia vinavatym i prysudziła jamu jašče adzin hod pazbaŭleńnia voli.
Viadoma, što Jafremienku ŭžo pieraviali ŭ mahiloŭskuju turmu № 4.
Kamientary