Łukašenka: Sajuznaja dziaržava — heta nie chimiera

Na pasiadžeńni Vyšejšaha dziaržsavieta Sajuznaj dziaržavy Rasii i Biełarusi, jakoje prajšło 10 śniežnia ŭ Maskvie, razhledžana 18 pytańniaŭ i pryniata Dekłaracyja z nahody 10-j hadaviny padpisańnia Dahavora ab stvareńni Sajuznaj dziaržavy.

Na pres-kanfierencyi pavodle vynikaŭ pieramoŭ, jakija z ulikam sustrečy prezidentaŭ u vuzkim składzie doŭžylisia vosiem hadzin, Dźmitryj Miadźviedzieŭ zajaviŭ, što Rasija «pravodziła i budzie pravodzić palityku, skiravanuju na dapamohu i padtrymku biełaruskaj ekanomiki».

Rasijski kiraŭnik vykazaŭ nadzieju, što «rašeńni, jakija prymalisia i ŭ miežach Sajuznaj dziaržavy, i ŭ miežach pracedur, što my pravodzili ŭ dvuchbakovym paradku, buduć sadziejničać minimizacyi nastupstvaŭ finansavaha kryzisu».

«Heta byŭ doŭhi, vielmi nasyčany dzień, jaki adlustroŭvaje adnosiny pamiž Rasijskaj Fiederacyjaj i Biełaruśsiu va ŭsioj ich paŭnacie, i tyja vialikija pierśpiektyvy, jakija jość, i tyja niavyrašanyja prablemy,

jakimi nie pakładajučy ruk z Alaksandram Ryhoravičam zajmalisia apošnija vosiem hadzin»,

— skazaŭ Miadźviedzieŭ na pres-kanfierencyi, što tranślavałasia ŭ pramym efiry telekanała «Viesti».

Na dumku prezidenta Rasii, takija sustrečy «vielmi karysnyja, bo, paśladoŭna pracujučy, abmiarkoŭvajučy vielmi ciažkija temy, vykazvajučy sprečnyja pazicyi, vychodziačy na kampramis, my ŭ kančatkovy vyniku sadziejničajem tamu, čym my pavinny zajmacca jak prezidenty našych krain — palapšeńniu jakaści žyćcia našych hramadzian, hramadzian Sajuznaj dziaržavy, žycharoŭ Rasijskaj Fiederacyi i Respubliki Biełaruś».

Jak zaznačyŭ Alaksandr Łukašenka, «kali b nie było vopytu sajuznaha budaŭnictva, nie było b i Mytnaha sajuza Biełarusi, Kazachstana i Rasii», a kali b nie było Sajuznaj dziaržavy, to nie było b i JeŭrAzES.

«Na žal, mnohaje zastałosia ŭ płanach, i nad hetym my pavinny pracavać, — zajaviŭ Łukašenka.

— My nie stvaryli adzinuju ekanamičnuju prastoru, ale poŭnyja rašučaści heta zrabić. Jość jašče ŭ našych adnosinach prykłady vuzkaviedamasnych, kanjunkturnych padychodaŭ da sajuznaha budaŭnictva. U nas zastajecca niezadziejničanym arhanizacyjny rezierv, kab bolš uzhodniena i efiektyŭna supraćstajać pahrozam i vyklikam novaha času. Jany źjaŭlajucca, napeŭna, kožny hod: to kryzis, to prablemy z ekałohijaj i h.d.».

«Ludzi ad nas čakajuć, kali my narešcie zavieršym pracu pa stvareńni roŭnadastupnaj adzinaj infarmacyjnaj prastory. Heta značyć pytańniaŭ, jakija treba vyrašać, dastatkova», — zaznačyŭ biełaruski kiraŭnik.

Na jaho dumku, Sajuznaja dziaržava — «heta nie chimiera, a realnaje i najbolš prasunutaje intehracyjnaje farmiravańnie na postsavieckaj prastory, jano zusim nie vyčarpała siabie, u jaho jość vidavočnyja pierśpiektyvy».

«Zaraz treba nie prosta prymać dakładnyja i zrazumiełyja rašeńni. My pavinny ich žalezna vykonvać, bieź ciahaniny, vuzkaviedamasnaści, na asnovie ŭzajemnaha davieru, adzinstva metaŭ. Biełaruska-rasijskija adnosiny buduć tolki tady paśpiachova raźvivacca, kali hetyja peŭnaść i abaviazkovaść nabuduć charaktar aksijomy ŭ dvuchbakovych adnosinach na ŭsich uzroŭniach dziaržaŭnaha kiravańnia», — padkreśliŭ Łukašenka.

Jon zaklikaŭ zrabić usio, kab sajuznaje budaŭnictva «išło bolš paśpiachova,

biez zamarozak, tarmažeńniaŭ, u maksimalna poŭnym abjomie vykonvałasia ŭsio toje, što z natchnieńniem było pryniata našymi narodami 10 hadoŭ tamu».

Pavodle słoŭ Łukašenki, na pasiadžeńni VDS razhledžany prablemy paliŭna-enierhietyčnaha kompleksu, finansavyja, pytańni abaronnaj prastory, vajenna-techničnaha supracoŭnictva, biaśpieki, «kompleks pytańniaŭ źniešniaj palityki». «My pryniali adpaviednaje rašeńnie», — skazaŭ jon.

«My pałovu času pryśviacili pytańniam zabieśpiačeńnia nieabchodnych mier aktyvizacyi handlu pamiž našymi dziaržavami», — zaznačyŭ Łukašenka. Aprača taho, pryniaty biudžet Sajuznaj dziaržavy na 2010 hod.

Nastupnaje pasiadžeńnie VDS projdzie ŭ lipieni 2010 hoda ŭ Minsku, paviedamiŭ biełaruski prezident.

• 0
• 0
• 0
• 0
• 0
• 0
• 0
• 0